Курыкмарий
Памятник деке – лӱдыкшӧ деч посна
Курыкмарий районысо корнылаште лӱдыкшӧ верлам нормативлан келшышын шотыш кондымо паша шукталтеш.
Козьмодемьянск – Кугу Сундырь (14-15 километр) да Картук – Йоласал – Пайскырык (0-1 километр) регионал трассыласе участкылаште «Медведевоагродорстрой» ОАО подряд организаций корным лопкаҥдышашлан шӧр гыч мландым кораҥден, тыгыде гранит кӱм оптен, асфальтым шараш ямдылен. Паша ынже кучалт манын, транспорт дене кудалышташ жаплан вес корным ыштыме.
Ты участкыште корнывож йӧршын уэмдалтеш. Лишыл жапыште ик километр кужытышто искусственный волгалтарыш лиеш, автобус чарналтыме кок у павильон шындалтеш да корныш лекме ешартыш полоса келыштаралтеш. Тыгак йолешке-влаклан куснашышт вончымо вер ден тротуар ышталтыт.
Лӱдыкшыдымылык шот дене йолешкылан авыртыш шындалтеш, шижтарыше меҥгым шогалтат да корно разметкым ыштат.
Тиде корнывож транспорт кӱлешлыкан веле огыл, эше регионын историйже дене кылдалтше лиеш: тушто курыкмарий-влакын князьышт Акпарслан памятникым шогалтыме. Пашам пытарыме деч вара районышто илыше да уна-влаклан ты кӱлешан тӱвыра объект деке лӱдыкшӧ деч посна логалаш йӧн ешаралтеш.
Юрий ИСАКОВ.
Снимкыште: корно лопкаҥеш.
Фотом «Марийскавтодор» ГКУ деч налме.
