Тений кеҥежым, 30 июль – 8 августышто, Йошкар-Оласе Марий паркыште пу гыч пӱчкедыше-влакын «Марий калыкын легендыже-влак» II всероссийском фестиваль-конкурсышт угыч лиеш.
Тудо кок кужыт дене эрта. Ончыч 20 май марте участник лияш шонышо-влак uprku@mail.ru электрон адресыш йодмашым колтышаш улыт. Но йодмаште вигак могай марий талешкым пу гыч пӱчкаш шонымышт нерген ончыктышаш улыт: Болтуш, Чоткар, Онар (кугу ийготан), Камай, Пашкан, Чумбылат, Акпатыр, Ош Пондаш, Тӱрек Суртан, Кокша, Нӧнчык патыр, Вувер кува, Пампалче, Овда, Кокша патыр.
Вара фестиваль эртыме кечылаште кидмастар-влак шке усталыкыштым паркыште ончыкташ тӱҥалыт.
Светлана Носова
Снимкыште: конкурслан тӱҥалтышым пыштыше Владимир Алманов.
Авторын фотожо
