«МАРИЙ ЭЛ» ТАЧЕ

Кумло ий эртен

Медведево районысо Ежово селасе Мироносицкий ӱдырамаш монастырьын настоятельницыже, игумения Варнавалан (Надежда Колчина) 65 ий темын.
1999 ийыште тудым монастырьын настоятельницыжлан шогалтеныт. Надежда Йошкар-Олаште православный шӱлышан ешыште шочын-кушкын. Воскресенский черкыште тынеш пуртеныт. Индеш ияшыж годым Троице- Сергиев лаврыш логалын. 1988 ийыште могай монастырьыш каяш – Дивеевскийыш але Пюхтинскийыш – шонкалымыж годым тудым виктарен шогышо игумен Никифор (Ртищев) каласен: «Тыйын мӧҥгыштет шкендын монастырет уло». «Ончыко ужын моштен, очыни», – теве тыге ойлат Варнава нерген Йошкар-Оласе епархий управленийыште.
1988 ийыште ӱдыр Ярославский епархийын Свято-Веденский Толгский монастырьжын послушницыже лиеш. Вара тудо ончыч монахиньыш савырныме символический йӱлам эртен да 1994 ийыште монахиняк лийын. А тиде нигунам марлан лекташ огыл, чыла шотыштат кугуракым колышташ да кӱштымыжым шукташ мутым пуымаш лиеш. «У илышыштыже» тудо Варнава лӱмым налеш.
Лач ты жапыште Мироносицкий обительым уэмден олмыктымо паша тӱҥалын. Варнавам кугурак монахиньыш кусарат да Йошкар-Ола да Марий епархийыш колтат. 2002 ийыште Святейший Патриарх Алексий II тудым игумениян санышкыже кусарен. Кумло ий жапыште монастырь йӧршеш вес сыным налын. Таче тудо чоным куандарыме да луштарыме верыш савырнен.
2020 ийыште Святейший Патриарх Кирилл матушка Варнавалан сылнештарышан ыресым нумалаш правам пуэн.
С.Носова
Снимкыште: матушка Варнавам шочмо кечыж дене саламлыме годым.
Фотом епархийын соцлаштыкше гыч налме.

Опубликовать в Одноклассники

Добавить комментарий