5 декабрьыште Марий Элыште веле огыл Марий тиште кечылан пӧлеклалтше «Марла чын возена» акций латкокымшо гана эртыш.
Ты гана организатор-влак тидлан Юрий Артамоновын «Кайык ӱжын ужата» повестьше гыч ужашым ойырен налыныт. Тудо «Вучымо вашлиймаш» маналтын. Чынжымак, акцийыш ушнымо тат вучымо лийын. Вет ик верыш чумырген, пырля тӱшкан марла диктантым возаш веле огыл, кеч-момат ышташ куанле. «Марий Эл» газет редакцийнат ты акцийыш ушнен. Тӱҥ редакторнан кабинетышыже погынен возенна.
А тыгай пырля чумырымо площадкыже Йошкар-Олаште кок вере лийын: Марий кугыжаныш университетын Калыкле тӱвыра да тӱвыра коласе кыл институтыштыжо да С.Г.Чавайн лӱмеш книгагудышто. Российысе регионлаштат тудо синхронно эртен. ВКонтакте соцкыл гоч вияш трансляций лийын.
Мутлан, университетыште эртыше акцийыш погынышо-влакым саламлаш ректор Михаил Швецов, республикысе тӱвыра, савыктыш да калык-влакын пашашт шотышто министрын алмаштышыже Игорь Садовин толыныт. Марий Эл Кугыжаныш Погын депутае Лариса Яковлева саламлен веле огыл, шкежат диктантым возаш шнчын. Акцийым тӱҥалме деч ончыч йӱла почеш классикна Сергей Чавайнын «Ото» почеламутшым, ӱдыр-влак шочмо вер нерген мурым йоҥгалтареныт. А вара радиовӱдышӧ Виктория Мамаеван текстым лудмыж почеш чыланат ручкам кидыш налыныт. Эн сайын возышо-влакым Тиште кечым торжественно пайремлыме годым палемдаш тӱҥалыт.
Светлана Носова
Снимкылаште: университетыште «Марла чын возена» акций годым.
М.Скобелевын фотожо.
