12 октябрьыште Йошкар-Оласе Чарла кремльыште регион-влак кокласе кӱкшытан «Угинде» калык пайрем лиеш.
Тудым республикысе Марий тӱвыра рӱдер Марий Элын Тӱвыра, савыктыш да калык-влакын пашашт шотышто, Ялозанлык да продовольствий, Промышленность, экономике вияҥмаш да торговльо министерстве-влакын полшымышт дене эртара. Тушко республикысе, тыгак Россий кумдыкышто илыше усталык коллектив, кидмастар, тоштер-ончер учреждений, сатум ыштен ужалыше-влак ушнен кертыт.
Участник-влак шке кундемысе калыкын «Угинде», «У пучымыш (немыр)», «Кышал», «Сорла пучымыш» йӱлам ончыктышаш улыт. Выступлений 10 минут деч кужун шуйнышаш огыл. Тыгак кажне усталык коллективлан куштымаш ден мурымаш номерым ямдылаш кӱлеш.
Ойыртемалтше-влакым диплом да пӧлек дене палемдаш тӱҥалыт.
Мероприятийыш ушнаш шонышо-влак йодмашым 4 октябрь марте mari-centr_konkurs@mail.ru электрон почтыш колтышаш улыт. Лекше йодышым 8(8362) 45-88-51 номеран телефон дене рашемдыман.
Светлана Носова
Авторын фотожо
