Марий Эл «Кугу Юл» макротерриторий турист схемым ыштыше 12 регион радамыш пурен.
Ты проект Юл кундемысе регион-влакын турист куатыштым тичмаш макрокумдык семын вияҥдаш шонымаш дене «Туризм и индустрия гостеприимства» нацпроектлан кӧра илышыш шыҥдаралтеш.
Эртыше кечылаште мемнан республикыш ты проектын экспертше-влак, ВЭБ.РФ кугыжаныш корпорацийын да кок проект-консалтинг компанийын специалистше-влак толын каеныт. Республикын турист куатшым шымлыме амал дене Юриныште, Козьмодемьянскыште да Йошкар-Олаште турист-влаклан келыштарыме верла ден инвестицийлык площадке-влакым ончен савырненыт.
Визит годым Марий Эл правительстве председательын алмаштышыже Дмитрий Троицкий дене вашлийыныт да «Кугу Юл» проект кышкарыште республикын илемлажым тӱзатен толмо нерген мутланеныт.
Эксперт-влакын шонымышт почеш, турист схеме регионын турист куатшым чыла могырымат почын пуаш полшышаш. Путешествийлан тыште сай кумдык почылтшаш, тыгак идалыкын кажне пагытыштыже турист услугым тӱрыс пуаш йӧн лекшаш.
«Кугу Юл» проект тений февраль гыч илышыш шыҥдаралтеш. Идалык гыч тудым Роосий Правительствыште ончыктышаш улыт Паша кок кужыт дене вораҥеш: макротерриторийын туризм сферыжым ончыч комплексно шымлат а вара 2030 ий марте туризмым вияҥдыме схемым ыштат.
Ты пашаш туризм сферысе мастер-планирований, бизнес-консалтинг областьысе специалист, регионла гыч верысе эксперт, социологий, инженер да транспорт инфраструктур дене пашам ыштыше отралььысе компаний-влакымат ушеныт.
«Турсхеме макротерриторийын кажне регионжылан вияҥшаш ойыртемалтше корным палемда, 2030 ий марте туризмым вияҥдыме цельым да инфраструктурым ыштышашлык паша кугытым рашемда», – каласен «ПроГород» ООО-н проектный офисшым вуйлатыше Ксения Титова.
Марий Эл Республик вуйлатышын администрацийжын пресс-службыжын уверже негызеш С.Носова ямдылен.
