Ӱдырамаш-влак нигунам огыт шоҥгем: ийгот ешаралтме семын пӧръеҥ-шамычын шинчалыкышт начарештеш, маныт. Мыскара йӧре ойлаш гын, ӱдырамашын илышыжат кум йыжыҥлан шелалтеш: ончыч тудо ачажым, вара марийжым да веҥыжым витара. Туге гынат тудлан пӧръеҥ-влак могай гына шомакым огыт пӧлекле!
«Ӱдырамаш – юж, ӱдырамаш – вӱд,
Ӱдырамаш – куан, ӱдырамаш – зиян,
Мыланем юмо кучыктен пуэн:
Тыйын ончылнет сукаш…»
Тек рушла, но кузе чонеш логалшын мура Сергей Куренков. 8 март вашеш «Тик-Ток»-ышто ты сем эре гаяк йоҥга. Виче велне 8 март деч кок арня ончыч тюльпаным пеш чот налаш тӱҥалме нергенат увер туштак шинчаш перныш. Эсогыл Кирово-Чепецкысе тепличный озанлык пеледышлан заказымат налмым чарнен манын серат. Юмылан тау, Йошкар-Оласе павильонлаште пеледыш ситышыла чучеш.
Ӱдырамаш пайремлан пӧлек денак кылдалтын тачысе йодыштмашна. Тораш коштмо огыл, журналист коллегына-шамыч деке лекме. А йодышыжо тыгай лийын: «Элым аралыше-влакын кечыштлан кузе ямдылалтат, тугак 8 мартым эртарет» манме ой дене келшеда мо?»
Ирина Степанова, «Кугарня» газетын тӱҥ редакторжо:
– Кӧн пелашыже але эргыже уло гын, нуно тыге каласен кертыт, очыни. Но мый пӧръеҥ пайремлан пелашемлан пӧлекым ом пу ыле гынат, тудо садак тидым ышта ыле. Пӧлекшат тудын эре оригинальный лиеда. Пелашемын ик жап фен-шуй велке лупшалтмылан кӧра эре тугайрак сынан пӧлек дене куандарен. Пачерыштына Хоттей будда, лотос пеледыш, окса пушеҥгат улыт, иктаж лу наре … Вара ик жап пеле-шергакан кӱ гыч сӧрастарышым кучыкташ тӱҥалын. Тылеч вара тӱрлӧ семын возыман медальоным пӧлеклен: «Эн йӧратымылан», «Эн сай пелашлан», «Эн сай авалан». 23 февральлан мыят эре пӧлекым ямдылем. Тиде гана ончылгоч алмаз шер гыч сӱретым ыштенам ыле. Икте-весылан кумылым нӧлтыманак, пӧлекымат ыштыман. Кеч изим, но куандарышым.
Светлана Архипова-Григорьева, «Кече-Солнышко» журналын тӱҥ редакторжо, Марий Эл Писатель ушем вуйлатыше:
– Школышто тунемме жап гычак мемнам тыге туныктеныт: 23 февральыште рвезе-влакым саламлыман, а 8 мартлан – нуно мемнам. Эшежым ме классыште 33 тунемше гыч луынжо гына ӱдыр лийына. Рвезе-влак изи пӧлеклан эсогыл оксамат погеныт.
Книга савыктыш пӧртыштынат ме пӧръеҥ-влакым шукерте огыл пеш моторын саламлышна. Ынде ӱдырамаш пайремым вучена. Ме ты гана пӱртӱсыш лекташ мутланен келшенна. Игече моторештын, куан кумылым ылыжташ полша. Мартын икымше кугарнянже Писатель ушемын погынымашыжым эртаренна. А тушко районла гычат чылан толыт. Чӱчкыдын вашлияш йӧн укелан кӧра, Ӱдырамаш пайрем денат пӧръеҥ-влак ончылгоч саламлен кодат. Кызыт саламлымашыже тӱрлӧ соцкыл гочат шуко пура, тидат кумылым нӧлта. А ешыште вате-марий коклаште, икте-весым саламлыде, пӧлекым кучыктыде, нигунам огеш эрте. Очыни, кажныжын тыге.
Людмила Григорьева, «Ямде лий» газетын тӱҥ редакторжо:
– 23 февраль нерген калыкыште «Носки ден сыра пайрем» манын ойлышат улыт. Мый 8 Мартлан носки да сыра дене гына ынем серлаге. Ме ӱдырамаш улына, утларак моторлыкым йӧртена, шкенамат пагалена. Сандене пеледыш аршашымат вучена. Ончыкыжымат пелашна тыгай моторымак, сӧралым ужшо манын, пӧлек шотеш моторлык денак кылдалтше салоныш монь сертификатым кучыктат гын, иктат тореш огеш лий, очыни. Шкемын ешыштат носки да сыра дене гына огына серлаге. Икте-весым пагален, тазалыклан, сын-кунлан пайдале да кӱлешан лийже манын шоненак, келшен толшо пӧлекым кучыктена.
Светлана Пехметова, «Марий Эл» газетын тӱҥ редакторжо:
– Ешыштем – кум пӧръеҥ, сандене 23 февральлан сайынак ямдылалташ логалеш. Тамле кочкышым ыштем, ӱстелым погем, кажныжлан пӧлекым кучыктем. А вара шкеже чонем дене моткочак 8 Мартым вучем. Вет тиде кечын лишыл еҥем-влакын ойыртемалтше кумылышт почылтеш. Эрденак тӱшкан пеледышым кучыктат, кумытын кум велым ӧндалын шупшалыт, пӧлек дене куандарат. Ача да ава-влакымат эреак саламлаш вашкена. Нунын кумылышт мыланна эшеат шерге.
С.Носова ямдылен
