«МАРИЙ ЭЛ» ТАЧЕ

Юл кундем мучко

Йошкар-Ола «Волжский вояж» турист поездын у маршрутышкыжо пурен.

 

Федерал пассажирский компаний «Волжский вояж» круиз да у турист поездым пашаш колтен. Тудын маршрутшто тыгай: Москва – Чебоксар – Йошкар-Ола – Нижний Новгород – Москва. Тудын полшымыж дене турист-влак Юл кундем федерал округыш пурышо регион-влакын ойыртемалтше верлаж дене палыме лийын кертыт.

 

Икымше рейс 24 апрельлан палемдалтын. Путешествий икмыняр кече шуйна, пассажир-влаклан маршрутыш пуртымо олала мучко обзорный экскурсий-влакым темлаш тӱҥалыт.
Мо дене Йошкар-Ола нунын кумылыштым налын кертеш? Историйым шарныктыше да кызытсе жаплан келшыше мотор оралтан архитектуржо дене.
Марий рӱдола мучко автобус да йолын коштмо экскурсий-влакым эртарат. – Турист-шамыч Национально-художественный галерейыште марий да руш сӱретче-влакын пашаштым ончен кертыт.

 

– Т.Евсеев лӱмеш национальный тоштер поян артефакт коллекцийже гоч марий калыкнан эртыме корныжо да тӱвыраж дене палдара.
– «Йошкин кот» гастротоштерыште марий калык кочкыш нерген каласкалат, «Заповедный Марий Эл» интерактив программыш ушат.
– Экскурсийыш М.Шкетан лӱмеш марий кугыжаныш драме театрын ямдылыме музыкальный интерактив программыжат пурталтын.

 

Марий Эл вуйлатыше Юрий Зайцев ик гана веле огыл палемден: регионна уло эл да лишыл йот элла гыч уна-влакым шке декыже шупшеш. Йошкар-Ола 100 наре турист маршрутыш пура. Нунын кокла гыч «Великий Волжский путь», «Край звонких гуслей», «Чудеса Земли Марийской» да « Царёв город без преград» маршрутла сайын палыме улыт.
Регион вуйлатышын палемдымыж почешак, марий рӱдолаштына туризм ик эн кӱлеша направленийлан шотлалтеш. Санденак олашке толшо турист-влакым сайын вашлийын-ужатен колтышашлан инфраструктур, услугым пуымо паша саемдалтеш, тӱвыра поянлык объект-влак дене палдарыме пашат тӱрлӧ йӧн дене пойдаралтеш.

 

Марий Эл вуйлатышын пресс-службыжын уверже негызеш Светлана Носова ямдылен.

Опубликовать в Одноклассники

Добавить комментарий