Элыштына специальный военный операций тӱҥалме деч вара идалык утла гыч Россий мучко «Жена Героя. Мать Героя» фотопроект илышыш шыҥдаралтеш.
1 апрельыште тӱҥалын
Тудо, ушештарена, Самарыште тӱҥалтышым налын. Кокымшо армийын командующийжын пелашыже Екатерина Колотовкинан тыгай проектым илышыш пурташ шонымашыже шочын. А таче тушко кумда элнан чыла регионжо ушнен.
Мемнан республикнат ӧрдыжеш кодын кертын огыл. «Жена Героя. Мать Героя» фотопроект Марий Элыште ӱмаште 1 апрельыште тӱҥалын. Тудо республик вуйлатыше Юрий Зайцевын полшымыж дене илышыш пурталтеш. Проектын кураторжо – Марий Эл Республикын Россий Федерацийын президентше пеленысе постоянный представительже Ольга Бадма-Халгаева. Организатор – Елена Чемоданова.
«Ме ойгылан вуйым пуэн огынал»
Ты проект, тудым еҥ-влакын кузе вашлиймышт, аклымышт нерген Елена Ивановна деч каласкалаш йодна.
– Калык тӱрлӧ семын вашлиеш. Иктышт ойлат: «Тыгай огеш кӱл. Молан ойгым ончыкташ?» Весышт, мӧҥгешла, сайлан шотлат, – рашемдыш тудо. – «Пеш кӱлешан проект. Тудо полшаш тарата, лишыл еҥыштым йомдарыше пелаш ден ава-влакым пагалыме кумылым луктеш. Тиде проект кызытсе неле жапыште, нимом ончыде, ваш-ваш эҥертен илаш кӱлмӧ нерген ойла» – маныт. Ятырынже ойлат: «Молодец улыда. Вуйым сакен огыда шинче, нелылыкым сеҥеда!»
Тиде фотопроектыш ушнышо-влак кокла гыч шукынжо шке кундемлаштышт салтак-влаклан мо кӱлешым чумырат да полышым нунылан колтат.
Шкеже ты проектым порысна семын аклена. Ӱмыр лугыч лийше салтак-влак курымешлан шарнымашеш кодшаш улыт. Кумшо – тудын гоч ончыктена: ме ойгылан вуйым пуэн огынал. Нимом ончыде, сеҥымаш садак мемнан лиеш. Элна сеҥыже манын, чыла ыштена. Ме ончыко каена. Чыла гаяк рвезе ден пӧръеҥ-шамычлан пелашышт пеҥгыде тыл улыт.
Кызыт – Кужэҥер районышто
Патриотизм шӱлышым шыҥдарыше тиде фотопроект республикыштына район гыч районыш куснылеш. Тыге шукырак еҥ тудын дене палыме лийын, выставкым ончен кертеш.
Але марте тудым Шернур, Советский, Медведево, Марий Турек районлаште илыше-влакын ончаш йӧнышт лийын. Кодшо кечылаште Кужэҥер районыш намиеныт. Выставкым Тоштер-ончер рӱдерыште почыныт (снимкыште). Тыште тудо 20 февраль марте лиеш. Умбакыже вес кундемыш кусна.
А чоныштышт мо ышталтеш?!
Проектыш чумырымо фотографий-влак, ик велым, тыглай улыт. Тушеч ӱдырамаш, пелашыжын але эргыжын кительжым вачышкыже пыштен я чиен, я кидышкыже фуражкыжым кучен, шкетын але икшывыж дене пырля ӱмбакет онча. Но, вес велым, тиде йӧршынат тыглай фото веле огыл! Кажныштыже пелаш але ава ласкан коеш гынат, тиде ласкалык шеҥгелне – тугай кугу ойго! Ӱдырамаш тыматлын коеш, а чоныштыжо мо ышталтмым шкеже гына пала. Мом ойлаш, чонжо урмыжеш, кычкырен шортеш! Кузе вес семынже?! Эн лишыл, эн шерге, эн йӧратыме мариетым але шӧртньӧ падыраш гай ончен куштымо шочшетым ӱмырешлан йомдарымеке, мом весым шижын кертат?! Тыгай годым тӱня кумыкталтмыла, йол йымалне мланде порволымыла чучеш!..
Но ӱдырамаш виян. Виян лийшаш. Специальный военный операцийыште вуйыштым пыштыше-влакын пелашышт ден авашт тыгай лияш тыршат. Вет ынде нимом от ыште. Илыш ончыко кая. Илыман. Самырык пелаш ден ава-влаклан шочшыштым куштыман, йол ӱмбаке шогалтыман.
Тау тыланда! Пеҥгыде лийза, геройна-влакын авашт. Чытыза, пелашышт-влак…
Любовь Камалетдинова
Фотом интернетысе соцкыл лаштык гыч налме
