ОБРАЗОВАНИЙ УВЕР ЙОГЫН

«Кидыштыда – мемнан ончыкылык»

5 октябрьыште Э.Сапаев лӱмеш Марий кугыжаныш академический опер да балет театр унаже-влакым – Марий Элын ик эн виян да ончыл туныктышыжо-шамычым – чевер роза пеледыш дене вашлийын. Мутат уке, тыгай вашлиймаш иктынат шӱм-чонжым тарватыде коден кертын огыл – пеледышым пӧлеклымеке,  кузе от шыргыжал!.. 

2-10 октябрьыште Россий мучко Туныктышо-влакын кугу арняшт эртен. Марий Элыштынат тудо кумдан палемдалтын, но эн тӱҥ ужашыже лач тиде театрыште лийын, вет тушко ты кечын педагог-влакым пайремышт дене саламлаш да поро мутым ойлаш республикым вуйлатыше Юрий Зайцев миен да ик эн уста туныктышо-шамычлан кӱкшӧ наградым кучыктен.

Тудо тыге каласен:

Таче педагог-влакын веле огыл, тыгак элыштына илыше чыла калыкын кугу пайремже. Молан манаш гын кажнынан чоныштыжо туныктышын поро лӱмжӧ ила. Вет лач тудо мыланна вияҥаш аклаш лийдыме надырым пыштен, ончыкылык илышыштына шкем муаш туныктен.

Еҥ-влакын пӱрымашышт, республикнан да элнан ончыкылыкышт наставник-влакын тыршымышт дене кылдалтын. Преподаватель шке тунемшыжлан эреак пример, тудо кушкын толшо тукымын чонышкыжо патриотизм шӱлышым шыҥдара да чын, шотан айдеме лияш туныкта. Марий Элын педагогшо-влак Россий туныктышо-шамычын профессионал сообшествыштышт сай верым айлат. Ме тидын дене кугешнена.

Ушештарена, Россий президентын кӱштымашыже почеш, образований сферын пашаеҥже-влакын статусыштым нӧлталаш манын, 2023 ий Педагогын да наставникын идалыкышт семын эрта. Туныктышын профессийже у кӱкшытышто лийже манын, республикнан правительствыже кӱлеш пашам шукта. Юрий Зайцев палемден: регионыштына школ ден йочасадлам капитально олмыктат. Тыгак тунемме паша сай условийыште эртыже, оҥай да пайдале лийже манын, образовательный организаций-влаклан кызытсе жаплан келшыше оборудованийым налыт.

– Тендан пашада чынжымак моткочак кӱлешан, те айдемым, тудын койыш-шоктышыжым да тӱняончалтышыжым ыштеда. Ӱмбалныда кугу ответственность – чын верч шогышо да шотан айдемым, шочмо элын патриотшым ончен кушташ. Шкендам аралыза, а ме тендам аралаш тӱҥалына, – ойжым мучашлен Юрий Зайцев.

Ты кечын Марий Элым вуйлатыше шке пашаштышт сеҥымашыш шушо педагог-влаклан кӱкшӧ наградым кучыктен.

«Марий Эл Республикысе образованийын сулло пашаеҥже» чап лӱм дене Оршанкысе И.К.Глушков лӱмеш шуко профилян колледжын преподавательже Надежда Леонова палемдалтын.

Марий Эл правительствын Чап грамотыжым ты гана Морко районысо Унчо школышто туныктышо Надежда Григорьева ден Советский районысо Вечын школышто тыршыше Алина Кудрявцевалан пуэныт.

Марий Элым вуйлатышын Тауштымашыжым Йошкар-Оласе 30-шо №-ан йочасадын воспитательже Юлия Герасимец ден Марий Турек районысо ешартыш образований рудерын директоржо Светлана Чернова сулен налыныт.

Тидын деч посна Юрий Зайцев сценыште икмыняр туныктышылан 50 тӱжем теҥгелан сертификатым кучыктен. Нунын радамыште улыт:

-–Анастасия Борисенко (Йошкар-Оласе Д.Э.Шаймарданов лӱмеш 29-ше №-ан школ);

– Людмила Васильева (Морко районысо Нурӱмбал школ);

– Вилена Горбунова (Волжск оласе лицей);

– Татьяна Данилова (Курыкмарий районысо Йоласал школ);

– Елена Завалишина (Йошкар-Оласе Т.И.Александрова лӱмеш 11-ше №-ан лицей).

Ты кечын погынышо туныктышо-влаклан поро мутым Марий Эл образований да науко министр Лариса Ревуцкая, Образованийын общероссийский профсоюзшын регионысо организацийжын председательже  Людмила Пуртова ойленыт. Лариса Ревуцкая республикысе образований сферыште тыршыше икмыняр еҥым министерствын Чап грамотыж дене палемден.

Палашлан, Маристатын данныйже почеш, 2022 ийыште республикысе общеобразовательный организацийлаште (тышке кас да частный тунемме верат пурат) 5011 туныктышо тыршен. Тышеч руш йылме да литератур дене – 599 еҥ, Российысе калык-влакын йылмышт да литератур дене – 150, историй, экономике, обществознаний да право дене – 313, математике дене – 467, информатике да ИКТ дене – 89, физике дене – 138, химий дене – 125, географий дене – 99, биологий дене -154, йот йылмыла дене – 515.

Г.Кожевникова

Опубликовать в Одноклассники

Добавить комментарий