Лиеда, кунам ик айдеме але еш деке уэш-пачаш «пӧртылаш» логалеш. А тидлан кугу амал уло гын, молан тудын нерген угыч каласкалаш огыл?
Теве пеледышым ончен куштышо моткочак чолга самырык ӱдырамашымак налаш. Тудо эше март тӱҥалтыштак У Торъял поселкысо пачерыштыже мӧҥгысӧ оранжерейым почын! Кӧн эше тыгайже уло? Адакшым ме тудын нерген икымше гана возымына годым кузе тиде эртыме, мо тушто лийме, мо улмо нерген каласкалаш сӧренна ыле. А сӧрымым вет шуктыман!
Наталья Курочкина мӧҥгысӧ оранжерейжым ончалаш мияш моткочак ӱжын ыле, но тӱрлӧ амаллан кӧра ончал толын шым шукто. Кеч-момат шке шинча денак ужмо годым, манмыла, кученак ончымеке, мутат уке, шижмаш весырак. Тунам чоным кугурак куан кумыл авалта. Но тыгай йӧн ыш лий гын, кызыт чылажымат вес йӧн дене – интернетысе вотсап полшымо дене – ужаш да аклаш лиеш. Наталья оранжерейже могай улмым видеошко сниматлен да мылам колтен. Тыге мыят пуйто тушко миен ончен тольым. Мом ойлаш? Мо сӧрал гын, сӧралак. Мыйын пачерыштемат пеледыш шагал огыл. Нуно окна янаклашкем огыт шыҥе, да пачер мучко вераҥдылынам. Эсогыл кӱвар ӱмбакат «телымсе сад» семын ик лукыш чумырен шынденам.
Но тиде ӱдырамашын дене, мутат уке, от таҥастаре. Тудыжын вет – оранжерей! А туштыжо могай гына пеледышыж ден кушкылжо уке?! Нуныжо, шкеат ужыда, чыла вере улыт. Пачер пырдыж мучко, ӱстембалне, подставкылаште … вераҥдылме.
– Пӱртӱс, мемнан илышнан ойыраш лийдыме ужашыже, пеледыш деч посна лийынжат огеш керт. Санденак мыйынат цивилизацийын кӱ джунглийже-влак коклаште У Торъял поселкышто мӧҥгысӧ оранжерейым почаш кумылем лектын. Тыгай шонымашем шукертак лийын. Да, тевыс, илышыштем икымше оранжереем почынам! – палдарыш ты сӧраллыкым ыштыше самырык ӱдырамаш Наталья Курочкина.
Тудо тӱрлӧ кушкылым шукертсек ончен кушташ йӧрата. Садланак уло яра жапшым пӱтынек лачшымак чонжылан келшыше ты сомыллан пӧлекла. Пеледышыж ден кушкылжо-влак шкенжымат, лишылже ден ончаш але налаш толшо еҥ-влакымат куандарышт манын, Наталья чылажымат ышта. Тудо кажныж нерген келшен толшо уверым кычалеш, муэш да нунын дене пайдалана. А тыге ышташ огыл гын, кошкат, пеледмыштымат чарнат. Тиде ӱдырамашын гын, ончыза, кузе кажныже шарлен кушкеш, сылнын пеледеш!
Кеч-моланат тӱткышым ойырет, чылажымат кӱлеш семын ыштет, вийым да жапым чаманыде тыршет гын веле лектыш лиеш. Натальян лектышыже коешак. Адакшым мӧҥгысӧ оранжерейыштыже тудо пеледыш-влакым кӱлеш семын ончен куштымо дене пырля нуным лачшымак кушто да кузе вераҥдышашымат, вес семынже декорым, шкежак шонен ышта. Санденак поселкысо пачерышкыже кеч-кунам пурет гынат, тушто эре сӧрал, эре мотор, эре пеледыш-влак пеледалтыт. Очыни, тиде амал денак ончычат, оранжерейым почмешкыжат, еҥ-шамыч тышке толаш йӧратеныт. Да кызытат тыгак. Поснак ӱдырамаш-шамычлан тиде чылажат моткоч лишыл. Адакшым озавате кажныжым шыргыжалын гына вашлиеш, чылаштым тамле кофе але чай дене сийла, да тиде жапыште нуно икте-весышт дене пеледыш, кушкыл-влак нерген вашкыде мутланен шинчат, ой-каҥашым йодыт але шкештат пайлалтыт. Кӧжӧ гын оранжерейым почмо кечын келшыше пеледышым налынат каен. Поро кумылан ӱдырамаш тунам чылаштлан могай-гынат пеледышым пӧлеклен колтен.
Икманаш, Натальян мӧҥгысӧ оранжерейже – тиде шкешотан ончер. А эше – поро шӱлышан вашлиймаш, пайдале вашмутланымаш да чоным куандарымаш.
Любовь Камалетдинова
Фотом еш альбом гыч налме
