Звенигово районысо Шигак шӱгарлаште мемориал комплексым уэмден олмыктымо деч вара тений 5 майыште 3071-ше №-ан эвакогоспитальыште Йошкар Армийын колышо сарзыже-влакым шарныме митинг икымше гана эртен.
Тыште икымше пионер линейке 1965 ийыште Сеҥымаш кече вашеш лийын. Тудым Красногорский посёлкысо Пионер-влакын пӧртышт пеленысе «Поиск» штабын вуйлатышыже Галина Аксенова организоватлен да шкеак вӱден. Вараже тыгай мероприятий йӱлашке пурен да общегражданский шарнымаш митинг марте кушкын. Кызыт тиде мероприятийыште школьник-влак деч посна эше самырык тукым, ветеран-шамыч, воктенысе илемлаште илыше калык участвоватла.
Олмыктымо да тӱзатыме деч вара мемориал комплекс палынак вашталтын. Тыште чылажат: салтаклан шарныктышат, колышо воин-влакын лӱмыштым возыман пырдыжат, брусчаткым оптыман корнат, пеледышлан ойырымо кумдыкат, у теҥгыл-шамычат – сайын койыт.
Красногорский ола шотан администрацийым вуйлатышын алмаштышыже Анжела Разумникован мутшо почеш, иза-шольо шӱгарым «Йӧнан оласе йырвелым ыштымаш» федеральный программын кышкарыштыже тӱзатыме. Чумыр пашалан 2,6 миллион теҥгем ойырымо. Подрядчик амалкалче Алексей Васильев тудым кӱлын да палемдыме жаплан шуктен.
Мут толмашеш, 3071-ше №-ан эвакогоспитальым Марий АССР-ын Наркомздравше 1941 ий 1 октябрьыште Кожласола селаште верланыше ончычсо зобный станцийын, поликлиникын, участковый больницын да лесотехнический техникумын тӱшкагудыжын зданийлаштышт почын.
Сусыргышо икымше салтак-влакым 20 декабрьыште конденыт. А Кугу Отечественнный сар ийлаште эвакогоспитальыште чылаже 12856 сарзым эмленыт, тышечын 6396 еҥже угыч воинский службылан йӧршӧ лийын.
Госпитальыште шым отделений лийын. Салтак ден офицер-влакым 25 врач, ты шотыштак вич хирург, 82 медсестра эмленыт. Тыгак изирак медицине да обслуживатлыше пашаеҥ-влак тыршеныт. Сарзе-влакын илышыштым арален кодаш, нуным стройыш пӧртылташ манын, медик-шамыч чыла ыштеныт. Нунын Кугу Сеҥымашлан пыштыме надырышт аклаш лийдыме кугу.
Чаманен палемдыман, сусыргышо 217 салтакын илышыжым утарен кертме огыл да нунын капыштым Красногорский посёлко деч тораште огыл верланыше Шигак шӱгарлаште иза-шольо шӱгарыш тойымо. Красногорский ола шотан администрацийын увертарымыж почеш, тушто Вологда, Горький (Нижний Новгород), Калинин (Тверь), Киров, Кострома, Куйбышев (Самара), Курск, Москва, Пенза, Рязань, Смоленск, Тамбов, Тула, Ульяновск, Хабаровск, Челябинск, Ярославль областьлаште, Башкортостан, Татарстан, Удмурт, Чуваш, Беларусь, Туркменистан, Узбекистан да Украин республиклаште шочшо сарзе-шамычын капышт кия.
М.ИВАНОВА
Фотом Красногорский ола шотан администраций деч налме
