29 апрельыште регионым вуйлатыше Александр Евстифеев Марий Элышке у коронавирус инфекцийым кондымым да шаркалымым шижтарыме шотышто оперативный штабын черетан заседанийыштыже 4 май гыч пашам ыштен кертше организаций-влакын спискыштым кумдаҥдыме нерген увертарен.
«Тидым изи бизнеслан, быт услуго сферлан вияҥашышт полшымо шонымаш дене ыштыме. Но тыгодым организаций-влак Россий законодательстве да Роспотребнадзорын актлаж дене пеҥгыдемдыме чыла йодмашым шуктышаш улыт», — палемден А.Евстифеев.
Тыге, IT-инфраструктур сферыште тыршыше, шинчалык ден контактный линзым ямдылыме да ужалыме, тыгак йолчием ден вургемым, быт техникым олмыктымо, химий дене эрыктыме, документлан фотом ямдылыме, ӱпым пӱчмӧ гай услугым пуышо, клининг организаций да молат 4 май гыч пашам ышташ тӱҥалын кертыт. Пунчал дене келшышын, юридический лица-влак калыкын иквереш чумыргымыж, кужу черетыште шогымыж деч услугылан ончылгоч возалташ йӧным ыштышаш улыт.
Моло организацийлан 11 май мартесе жапым пашадарым арален кодыман пашам ыштыдыме кече семын увертарыме. Кучем орган, медицине тӧнеж, аптеке пункт, калыклан кочкыш продуктым ситарыше, вес жапыш кусараш лийдыме пашам шуктышо организаций-влак ончычсо семынак пашам ыштат.
А.Евстифеев министр-влаклан муниципальный образованийлам, правам аралыме органлам вуйлатыше-шамыч дене пырля РФ президент ден Марий Элым вуйлатышын указлаштын шукталтмыштым тергаш кӱштен, поснак – черланыме чотым иземдашлан районлаште посна улмо режимым шуктымо шотышто.
Марий Элым вуйлатышын организаций да
аналитике виктемжын уверже негызеш М.ИВАНОВА ямдылен
