Ончыза, аклыза, куаныза…
Ты кечылаште Национальный художественный галерейыште «Руш художник-путешественник-влак» лӱман ончер почылтын. Тушто кумдан палыме кумло утла сӱретчын кудло наре пашаже ончыкталтын.
Республикыштына илыше калыкым руш художник-путешественник-влак ден палдараш йӧным Марий Эл тӱвыра, савыктыш да калык-влакын пашашт шотышто министрын пашажым шуктышо Константин Ивановын Руш тоштер дене вашкылым ыштымыже полшен.
Ончерыш XIX да XX курымыласе радына-влакым чумырымо. Нуным ончен, пуйто ик жаплан эртыше илышыш пӧртылат, руш искусствын историйжым шергалат да путешественникыш савырнет. Ты ончерыште радына-влак Италий, Испаний, Франций, Египет, Китай гыч улыт. Теве Иван Айвазовскийын Италийыште улмыж годым ыштыме пашаже: тӱрлӧ чиян да кечыйолан курык, шинчал таман теҥыз вӱд, кава… Ончет да южышто пеледышын тутло пушыжым шижат… Тунамсе жапысе калык, йӱла – чылажат сайын коеш. Анна Остроумова-Лебедеван шкешотан радынажымат палемдыме шуэш: тыгай тӱсым муын, кудыжым тыглай еҥ огешат уж.
Ончерым Руш тоштерын пашаеҥже Павел Климов почын. Тудын ойлымыж почеш, икымше тыгай ончер 2009 ийыште Санкт-Петербургышто лийын. Йошкар-Олаште тудо 2023 ий 22 январь марте лиеш. Палемдыме жап марте тушто тӱшка экскурсийым, оҥай вашлиймашым эртарат.
– Самырык сӱретче-влакланат ончаш темлем, студентем-шамычым обязательно кондем, – каласыш И.Яковлев лӱмеш Чуваш кугыжаныш педагогике университетын доцентше, сӱретче Валерий Чеботкин.
М.СКОБЕЛЕВ
Авторын фотожо
