Тиде кечылаште Марий Элыште Россий кӱкшытан «Профессионал-влак» чемпионатын регионысо йыжыҥже эрта.
Тений тушто чумыр налмаште 50 компетенций дене 300 наре участник (кыдалаш профессионал образованийым пуышо верыште да школышто тунемше) профессионал мастарлыкым ончыкта. Конкурс площадке-влак республикын техникум ден колледжлаште верланеныт.
Таҥасымашым торжественно почмо годым участник-влаклан сеҥымашым Марий Эл правительстве председательын алмаштышыже – тӱвыра, савыктыш да калык-влакын пашашт шотышто министр Константин Иванов ден регионын образований да науко министрже Лариса Ревуцкая тыланеныт.
Чемпионатын Паша программыже квалификациян пашазе, служащий да кыдалаш звенон специалистше-влакым ямдылыме шотышто республикысе координационный советын кумдаҥдыме заседанийже дене почылтын. Тушко погынышо-влак Марий Элын экономикыжлан ик эн кӱлешан специалист-влак да нуным ямдылыме сферыште кугыжаныш политикын ик тӱҥ задачыже-влак нерген каҥашеныт.
Таҥасымашын сеҥышыже ден призёржо-влакым 10 мартыште, чемпионатым торжественно мучашлыме годым, увертарат.
Г.Кожевникова
Фотом Марий Эл Образований да науко министерствын, СПО-н да Йошкар-Оласе сервис технологий-влак техникумын соцкылысе лаштыклаж гыч налме
