22-23 июньышто республикыштына Самырык-влакын этногруппо, вокал да семӱзгар ансамбль-шамычын фестивальышт эртен.
Мероприятийыш ушнышо-влаклан икымше кечын «Этнотӱвыра паша да калык-влак кокласе кыл» пресс-конференций да кумдан палыме семмастар, профессиональный музыкант, мурызо, педагог-шамыч дене вашлиймаш-влак лийыныт. Тушто Марий Элысе да Российысе калык-влакын тӱвырашт да семӱзгар-влак дене шоктымо мастарлыкым вияҥдыме нерген каҥашеныт. Тиддеч посна мастер-класс, тӱвыра да экскурсий программе, этнокас да молат оҥайын эртеныт.
Кокымшо кечын фестиваль Медведево посёлкысо площадьыште шуйнен. Сценыште Морко, Оршанке, Курыкмарий, У Торъял районла, Йошкар-Ола ден Волжск олала гыч веле огыл, Самара, Саратов областьла, Татарстан, Чуваший республикла гыч толшо творческий коллектив-влакат мастарлыкым ончыктеныт. Нуным жюри аклен. Тудын иктешлымыж почеш, Гран-прим Я.Эшпай лӱмеш калык культур рӱдер пеленсе калык коллектив лӱмым нумалше «Аяр» группо сеҥен налын (Курыкмарий район).
Лауреат лӱм дене «Время пришло» рок-группо, «Фрегат» (Медведево район), «Виват» (Саратов область) вокал да семӱзгар ансамбль-влак, «Жигулёвские вольницы» музыкальный артель (Самара область), «ПНП» (Оршанке район), «Морко кундем» семӱзгар (Морко район), «AORband», «У Еˆ fm» группо-влак (Йошкар-Ола) палемдалтыныт.
Тиддеч посна лӱмын ямдылыме диплом дене калыкын тӱвыражым арален кодымылан Озаҥ ола гыч «Туганнар» ден Чуваш Республик гыч «Аса Ил», творческий кычалмашлан Волжск ола гыч «Грусть а мажоре» вокал да семӱзгар ансамбль-влак палемдалтыныт.
Коллеге-влакын аклыме дипломышт Саратов гыч толшо «Виват» вокал да семӱзгар ансамбльлан логалын.
— Фестивальыш моткоч мастар коллектив-влак ушненыт. Кажныже ойыртемалтше. «Аяр» группын солистше-влак Владимир Юшкин, Сергей Коротков (тудак вуйлатыше), Ирина Юшкина да Дарья Саличкина ныл йӱк дене мастарын мурышт, — палемдыш жюри член, Композитор-влак ушемын Марий Элысе пӧлкажын председательже, Россий Федераций искусствын сулло деятельже Валерий Кульшетов. — Участник-влак дене мастер-классыштат кӱлешан темым тарватыме. Тушто ме тошто мурым уэмден, калык семӱзгарлан келыштарен, сценыш лукташ кӱлмӧ нерген мутланенна. Вес ийлан фестивальыште тыгай формат дене мурымым пурташ шонена. Ончыкшым йоча коллектив-влак шукынрак ушнат манын ӱшаныме шуэш.
А.Байкова
