У Торъял районышто икмыняр ий ончыч «Толмань» кол озанлык чот чапланен ыле. Тудым ятырын сайын паленыт. Тыгай кугу кӱкшытыш озанлыкым вуйлатыше Анатолий Леонидович Пузырников нӧлталын.
Ила гын, 9 апрельыште тудлан 72 ий темеш ыле. Сандене чапланыше вуйлатышым шарныме лӱмеш шочмо кечынжак Овалже книгагудышто шахмат дене турнирым эртареныт. Тудлан тӱҥалтышым ты кундемын чолга еҥже Николай Аркадьевич Сидоркин ыштен. Тыге шахмат дене таҥасымашыш кумылан-влак тений кокымшо гана чумыргеныт. Нуно Овалже гыч веле огыл, тыгак Кугу Лумарий, Кугу Пызак ялла да У Торъял поселко гычат, чылаже 18 участник, лийыныт.
Нунылан эн ончычак Анатолий Леонидовичын Владимир эргыже сеҥымашым тыланен да ачажым шарнымылан тауштен. Тыгак У Торъялысе книгагудо вуйлатыше М.Протасова, А.Пузырниковын йолташыже да тудым палыше-влак ойленыт.
Таҥасымаште икымше верым У Торъял гыч Виктор Косоротов сеҥен налын. Кокымшо верыш Кугу Лумарий гыч Анатолий Сидоркин лектын. Кумшо вер дене Кугу Пызак гыч Иван Смирнов палемдалтын.
Турнир лӱмеш библиотекыште книга ончерым ямдыленыт. Толшо-влак тушто шахмат, чапланыше шахматист-влак нерген книга ден энциклопедий-влак дене палыме лийын кертыныт.
Л.Камалетдинова
