Туриаде-2022
Марий Эл икымше
Эртыше каныш кечылаште Йошкар-Оласе «Корта» ече базыште спорт туризм дене Юл кундем федерал округын первенствыже эртен.
Тушто ПФО-н 13 регионжо гыч 14 гыч 21 ияш марте 200 утла спортсмен вийжым терген. Команде-влак коклаште икымше верым Мрий Элын сборныйжо, кокымшым пошкудо Татарстан, кумшо верым Удмурт Республике налыныт. Ече дене эстафетыште адакат оза-шамыч ончыко лектыныт. Удмуртий гыч команде ший призёр, а Пермь край гыч сборный кумшо лийыныт.
– Тыгай кӱкшытан таҥасымаш мемнан дене икымше гана веле огыл эртаралтеш. Участник-шамычлан тыште келша. Адакшым тыгай таҥасымашлам эртараш мемнан дене чыла йӧн ышталтеш, – ойла спорт туризм дене мероприятийын ик организаторжо Александр Алафузов. – Таҥасымаш деч вара каналташат, сылне вер-шӧрым ончалашат, кастене волгыдемдыме трассыш тренировкыш лекташ лиеш.
Чынак, теве ик кумдыкышто нелылыкым эрташ турлӧ чаракым ыштыме: пырням келыштарен оптымо, кандыра дене кӱкшытыш кӱзаш, тыгак ик пушеҥге гыч весыш канат дене писын эртышаш спорт туризмлык йӧным ыштыме. Ечыгорныжат пеш чапле. Вес семынже огешат лий, вет ретракт дене эреак лумым таптен эртат, тӱткын эскерат, тергат.
Саламлена спортсменна-влакым икымше вер дене.
Е.Эшкинина.
