СПОРТ

Ий ӱмбалне – кайык семын

15-17 январьыште Йошкар-Оласе «Марий Эл» ий полатыште 2005-2010 ийлаште шочшо-влак коклаште хоккей дене А.В.Тарасов лӱмеш «Шӧртньӧ шайбе» всероссийский турнирын кокымшо этапше иктешлалтын.

Тушто регионнан икмыняр районжо гыч команде-влак таҥасеныт. Участник-шамыч кум тӱшкалан шелалтыныт.

   15 январьыште 10-11 ияш хоккеист-влак ий ӱмбаке лектыныт. Ты группышто кандаш команде мастарлыкшым ончыктен. Марий Турек, Звенигово, Медведево, Параньга районла, Йошкар-Ола ден Волжск гыч лийыныт. Волжск гыч «Ариада» команде икымше верыш лектын. Кокымшо – «Ястребы» (Йошкар-Ола), кумшо – «Восток» (Марий Турек).

Изи хоккеист-влакын модмыштым мыят ончышым. Моткоч оҥайын койыт. Ий мучко пуйто «чоҥештылыт». Техникат уло, икте-весылан шайбымат сайынак, тура пуаш тыршат, торжалыкымат ончыктат. Но вет тиде тыгай спорт, куштыжо, вучыдымын, шке капкашкат шайбе «пурен возеш», тыгодым йоча-влакын кумылышт вола.

Мо-гынат, команде-влак путырак сай модмашым ончыктеныт.

16 январьыште 12-13 ияш рвезе-влак таҥасеныт. Ты тӱшкаште куд команде вийжым терген. Нунын коклаште адакат Юл кундемын хоккеистше-влак ончыко лектыныт. Кокымшо верым Марий Турек гыч «Восток» команде налын гын, кумшым – «Спартанец» (Медведево район).

17 январьыште кугурак ийготан спортсмен-влак модыныт. Икымше верыш адакат Волжский район гыч ындыжым «Илеть» команде  лектын.

– Матч-влак мучашлалтмеке, участник-шамычым саламленыт. Марий Элын физический культур, спорт да туризм министерствыже кубок, медаль да Чап грамот дене палемден. Тыгак сеҥыше-влаклан эккипировкым, хоккей тоям налаш сертификатым кучыктеныт, – ойла «Марий Эл» ий полатыште спортын ий дене кылдалтше спорт школын вуйлатышыже Т.Шарнина.

Палаш: «Шӧртньӧ шайбе» турнир 1964 ийыште тӱҥалтышым налын. Анатолий Владимирович Тарасов гай кумдан палыме еҥ-влак арам огыл тыгай таҥасымашым шонен луктыныт, вет тыгай турнирла гыч варажым  палыме хоккеист лийыт. Мутлан, Марий Эл гыч «Спартак» командыште модшо Захар Шабловский кызыт Москваште «Спартак» командыште модеш, Марат Хайруллин («Ариада» команде, Волжск) кызыт Нижнекамскыште «Нефтехимик» командын чапшым арала. Тиде моткоч сай кӱкшыт. Нунын модмыштым телевизор денат ужына.

Эртыше турнирыште сеҥыше команде-влак Сочиште финалыште вийыштым тергаш тӱҥалыт.

Такшым хоккей – спортын моткоч шерге видше. Изирак ийготан капка оролым чикташ 50 тӱжем теҥге кӱлеш. Аралтышыжак 30 тӱжем теҥгеш шуэш. Тылеч посна хоккей тоялан тыглайжылан (пу гыч ыштыме) 3-5 тӱжем теҥгем луктын пыштыман гын, чаплыжлан – 10 тӱжемым. Ӧрдыж кундемыш модаш лекташ, корнылан, унагудышто илаш, кочкаш да моло роскотланат шийвундо деч посна ок лий. Сандене спортын ты видше дене шонышо кажне рвезе кылым кучен огеш керт.

Е.ЭШКИНИНА

Опубликовать в Одноклассники

Добавить комментарий