Шукерте огыл икмыняр кечаш тӱнямбал кӱкшытан «Тур де Ски» таҥасымаште Россий гыч ечызе Сергей Устюгов икымше верым налын. Нимогай допинг деч посна шым старт гыч кудыштыжо – абсолютный чемпион, иктыштыже кокымшо лийын, тӱнямбалне эн тале улмыжым ончыктен. Лач тидымак соперникше норвежец Мартин Сунбю палемден.
Тиде самырык ечызе Сочиште эртыше Олимпиадыште спринтыште финалыште вийжым терген. Тудо тунам сеҥышыш лектеш манын шоненыт, но… Тӱрлӧ амаллан кӧра визымше гына лийын. Такшым тунамак чыла специалист-влак Сергейым ончыкылыклан ӱшаным пуышо, сай спринтер кушкеш манын палемденыт. Сергейлан тиде келшен огыл: рвезе чыла тӱрлӧ кужытыштат шкенжым тергаш шонен, тудлан чылажат келшен да универсал лиеш манын ойлен. Вес тургым ечызылан тыглай эртен, но варажым шкенжым ончыктен. Ончыч «Тур де Ски» стартыште – кумшо, варажым тӱнямбал кубокышто спринтер огыл дистанцийыште икымше гана – сеҥыше, тӱшка стартыште (масс-старт) чылаштым шеҥгелан коден.
Теве ынде икмыняр кечаш «Тур де Ски» таҥасымаште ик стартыште лач норвежец Мартин Сунбюлан гына сеҥалтын. «Моткоч чот сеҥынем ыле. Тӱҥалтыште сеҥем манын шоненат омыл. Классик йӧн дене изиш нелырак ыле. А коньки йӧн дене куржмекем, эн тале лу ечызе коклаш логалам гын, йӧра, манынат шоненам», – палемден кумшо январьыште кумшо стартыште, скиатлонышто ончыко лекмыж деч вара ечызе. Нылымше январьыште преследованийыште сеҥымыж деч вара ече спортым эскерыше-влак паленыт: ындыже Устюговым садак иктат ок эрте, Сергей икымше лиеш. Тыгак лийын.
С.Устюгов 1992 ий 8 апрельыште Ханты-Мансий автономный округысо Междуреченский посёлкышто шочын. Изинекак ече спортлан шӱмаҥын, тренер Иван Брагин дене ямдылалтын. Биатлон нергенат шонен, эсогыл кундемыштыже ты вид дене тӱҥ сборныйыш запасной семын лийын. Ече дене таҥасымаште сай деч сай результатым ончыкташ тӱҥалынат, тидым умбакыже вияҥден, шуаралтын. 2011 ийыште Устюгов шкеж деч кугурак-влак коклаште таҥасен, юниор-шамыч коклаште тӱнямбал чемпионатыште сеҥен. Эше ик ий гыч Эрзурзумышто – икымше. Тӱнямбал первенствыште ныл дистанцийыштат сеҥышыш лектын. 2013 ийыште молодёжь коклаште эртыше тӱнямбал чемпионатыште кок шӧртньӧ медаль дене палемдалтын. Адакат соперникше-влак деч кок ийлан изирак лийын. Тылеч вара тудым Россий сборныйын тӱҥ командышкыже налыныт. Тиде ийынак тӱнямбал чемпионатыште команде дене эстафетыште бронза призёр лийын.
Теве ынде «Тур де Ски» таҥасымашыште – рекордсмен да сеҥыше. Допингым кучылтмо шотышто адакат умылыдымаш тӱҥалме жапыште, икмыняр ечызым дисквалифицироватлыме деч вара Сергей Устюгов эн яндар да тале руш спортсмен, сеҥыше семын палемдалтын.
«Финиш деч вара нимогай эмоцият уке. Тыге мый моло россиян-влак олмешат таҥасенам. Тау чыла болельщиклан, мыйын верч пӱтынь Россий тургыжланен», – ойлен ик интервьюшто Сергей.
Палаш : «Тур де Ски» таҥасымаш икымше гана 2007 ийыште эртен.
Черетан вес таҥасымаш – Финляндийыште тӱнямбал чемпионат.
Е.Эшкинина.
