Марий Элысе медицине организаций-влак ончычсо паша радамышкышт пöртылыт да плановый манме полышым угыч пуаш тÿҥалыт.
Республикыштына у коронавирус инфекций дене кылдалтше сÿрет саемын толеш. Черланыше-шамычын чотышт кечын гаяк иземмылан кöра инфекционный койко-влакымат шагалемдыме да инфекциян огыл хронический патологиян черле-влаклан плановый медицине полышым пуаш пöртылтымö.
Калыкын поснак чот черланыме пагытыште регионысо 8 стационарыште 1965 ковидный койко лийын гын, таче кечылан 870 койкым профильный отделенийлашкышт кусарыме. Койко фондым тылзе мучашлан эше 110 единицылан иземдаш палемдыме.
Эртыше арнян Сар-влакын ветераныштын республиканский клинический госпитальыштышт койко чотым икшырымын иземден толмо. Эмлымверыш у пациент-шамычым пыштыме огыл, лач паремше-влакым гына мöҥгышкышт колтымо. Кызыт госпитальыште санитарно-эпидемиологический обработкым ыштат, шушаш арня гыч медицине организаций черле-влаклан плановый полышым пуаш тÿҥалеш.
Йошкар-Оласе да Йоча республиканский клинический больницылаштат койко-влакым шагалемдат.
– У коронавирус инфекцийын визымше толкынжо «дельта» да «омикрон» штаммла дене кылдалтын, – каласкала регионын тазалык аралтыш министржын алмаштышыже Татьяна Бастракова. – «Омикронын» ВА.1, ВА.2 да ВА.3 подвидше-шамычым рашемдыме. Икымшыже «дельта» деч утларак шарлымыж дене ойыртемалтеш. Шанчызе-влак ВА.2 («стеллс») подвидын ВА.1 деч ныл пачаш писын шарлымыжым рашемденыт. Республикыштына чер утларакше «омикронын» ВА.2 подвидшылан кöра кенета ылыж каен, тыгодым «дельтажат» лыпланен огыл. Практике ончыктен, у коронавирус инфекций деч вакцинаций поснак «дельта» штамм дене черланыме годым пайдале лийын, но «омикрон» дене инфицироватлалтше-шамычат черым куштылгынрак чытен лектыныт. Сандене калыкым COVID-19 деч умбакыжат вакцинироватлалташ да ревакцинироватлалташ ÿжам.
М.ИВАНОВА
