УВЕР ЙОГЫН

Вер чылаштлан ситышаш

Марий Элыште вес ий гыч 3 гыч 7 ияш марте 100 % йочалан садиклаште вер лиеш. Тидын нерген республикын образований да науко министрже Наталья Адамова ойлен.

Йочасадлаште верым ситарыме да тулык, тыгак ача-аван полышышт деч посна кодшо икшыве-влаклан илыме верым чоҥымо срокым шуктымо йодыш-влаклан 21 октябрьыште Марий Эл вуйлатыше Александр Евстифеевын Наталья Адамова да Йошкар-Олан мэрже Евгений Маслов дене эртарыме совещаний пӧлеклалтын.

— Кызыт 9В ден Молодежный микрорайонлаште верланыше кок садикыште чоҥымо паша мучашке лишемеш. Ноябрьын кокымшо пелыжлан нуно тӱрыс ямде лийшаш улыт. Вес ийын Мирный микрорайонышто 320 веран садикым чоҥаш контракт ышталтын, — каласен олан мэрже.

Тыгак тудо Йошкар-Ола кумдыкым комплексно вияҥдыме ойпидыш дене келшышын, подрядчик-влак дене паша эртаралтме нерген ойлен. Ойпидыш-влак почеш, айлыме кундемлаште арендатор-шамыч йочасадлам чоҥышаш да муниципал але кугыжаныш собственностьыш пуышаш улыт. Но, Евгений Масловын ойлымыж почеш, чыла подрядчикак огыл сӧрымым шукта. Тиде амал дене эсогыл кок уголовный делам тарватыме.

Образований да науко министр палдарен: тений 1 октябрьлан 3 гыч 7 ияш марте икшыве-влаклан йочасадлаште 99,3 %-лан вер ышталтын, 1,5 гыч 3 ияш марте-влаклан – 79 %-лан.

— 2021 ий 1 январьлан 3 гыч 7 ияш марте икшыве-влаклан вер 100 процентлан ситышаш. А 1,5 гыч 3 ияш марте-влаклан – 90 % марте, — каласен Наталья Адамова.

Марий Эл вуйлатыше йочасад-влакым умбакыжат чоҥаш да кокымшо показательымат 100 % марте шукташ кӱштен.

Рӱдолан мэржын палдарымыж почеш, тулык да ача-аван полышышт деч посна кодшо икшыве-влаклан шуко пачеран пӧрт чоҥалтеш. 60 пачер шотышто контракт ышталтын.

— Ноябрьыште пӧртым приниматлена да тушко илаш пуртена. У коронавирус инфекций шарлыме лӱдыкшӧ улмылан кӧра нелылык палдырна гынат, тиде задачым ме жапыштыже шуктена, — ӱшандарен каласен Евгений Маслов.

Тулык икшыве-влаклан пачерым ситарышашлан тений 340 млн. утла теҥгем ойырымо. Тиде окса полыш дене 322 еҥ илыме веран лийшаш.

Марий Эл Республикым вуйлатышын организаций да

аналитике виктемжын уверже-влак негызеш

Л.ККАМЛЕТДИНОВА ямдылен

Опубликовать в Одноклассники

Добавить комментарий