Республикысе калык усталык да тӱвыра ден каныме паша шотышто шанче-методике рӱдер 80 ияш лӱмгече идалыкыштыже ончычсо лӱмжым пӧртылтен.
Ынде тудо Республикысе калык усталык пӧрт маналтеш.
Вашталтышым шонен ыштыме ошкыллан шотлат, тидыже учрежденийын эртен толмо корныж денат кылдалтын. Организаций шке пашажым сар деч вара 1946 ийыште тӱҥалын, да 80 ий жапыште Усталык пӧрт гыч шанче-методике рӱдер марте эртен.
Республикысе калык усталык пӧрт лӱмжым пӧртылтымӧ дене учреждений тӱҥ пашажым пеҥгыдемда. Тудо Марий Элысе тӱвыра да каныме учреждений-влаклан икте-весе дене кылым ыштыше, методике да усталык рӱдер семынак кодеш. Коллеге-влаклан верыштышт методике полышым пуат, фольклорым, йӱлам да декоративно-прикладной сымыктышым аралат, республикыштына «Сеҥымаш тулсавыш» да «Усталык памаш» фестивальлам эртарат, любительский коллектив-влаклан вияҥашышт да «калык», «образцовый» лӱм-влакым налаш полшат. Нине йыжыҥла – еҥ-влакын кече еда шуктымо пашашт, тидлан кӧра Марий Элыштына калыкнан тӱвыраже мурышто, куштымаште, ыштыш-кучышышто да пайремыште ила.
Алевтина БАЙКОВА
