Марий рӱдолаштына Марий Эл Республикын лӱмгечыжым палемдыме кечын угыч «Онар» ресторан пашам ышташ тӱҥалын.
Тудын тӱжвал сынжат ынде куан шӱлышым луктеш. Директоржо – марий предприниматель Вячеслав Вороноцов. Моткоч ӱшаныме шуэш, ӱ шӱлышым налше тошто ресторан «Мари» сийгудо гаяк калыкыште пагалымашым сулен налеш.
Историйым шергалаш гын, рӱдолаштына ты ресторанын икымше оралтыже кодшо курымын колымшо ийлаштыже пырня дене чоҥалтын. Икымше пачашыштыже ресторан лийын, а кокымшыштыжо – унагудо. Но ресторанже тунам «разливайке» манметым ушештарен, возат историк-влак. Коло тӱрлӧ аракам ужаленыт. Тушко тӱҥ шотышто кужгӧ чондаян-влак пурен коштыныт. Закускылан буфетчик-влак эше революций деч ончычак лекташ тӱҥалше икмыняр тӱрлӧ шоколадым темленыт гын, кумылым нӧлташ тунамсе шлягер-влакым шынденыт.
Кодшо курымын кумлымшо ийлаштыже рестораныш тӱҥ шотышто творческий интеллигенций кошташ тӱҥалын. Но шкем вольнан кучаш чаралтын манашат лиеш. А йӱын орышо-влак шотышто административный мерымат кучылтыныт.
Кокымшо пачашысе унагудышо тунам «Путёвка в жизнь» икымше йӱкан киношто модымыж дене чапланыше Йыван Кырлат арестоватлымешкыжак, 1937 ий апрель марте, илен.
Пу гыч ыштыме оралтым кодшо курымын кудлымшо ийла тӱҥалтыште ремзаводыш кусареныт. А тыште архитектор А.А.Медведевын проектше почеш сийгудылан у кермыч оралтым нӧлтен шынденыт. Тудын тӱжвал да кӧргӧ сынже таче марте аралалт кодын. Индешлымше ийла марте ресторан чынжымак чапланен. Когыльо ден тортымат тушто ыштен ужаленыт. Калыкыште ты сатум сайын налыныт. Кочкашат сайын пушкеныт. Но тыге олаште «Таир» лӱман вес марий конкурент ресторан почылтмешке лийын. Чаманен каласыман, варажым «Онарын» чапше эркын шулен. А пытартыш жапыште тудо яра шинчен манашат лиеш. Теве ынде тыгай чапле марий лӱман сийгудо угыч почылтын. Тек тудын сийже тушко мийыше кажне еҥым Онар патыр гаяк вияным ышта.
Снимкыште: «Онар» ресторанын у сынже.
И.Речкинын фотожо.
