У ий салам: Шернур район
Пашаче калыкем, У ий дене!
Адакат У ий вашеш эртыше идалыкым иктешлен ончалде ок лий. Тудо ялозанлыклан пешыжак келшен толшо огыл ыле. Игече кукшо шогымылан кӧра шурно лектыш ӱмашсе деч начаррак лие – 20 процентлан шагалрак шийын нална. Моло вереат сӱрет тыгайракак, шонем. Санденак пырчын акше тений кугеме, да тидыжак озанлыклам парымыш пурымо деч утарен кодыш. Вольык озанлык нерген ойлаш гын, лектыш ӱмашсе гаяк ыле. Тидлан кӧра озанлыкна удан огыл илен лекте.
Шушаш ийлан план нерген ойлаш гын, кугу вашталтыш лийшаш огыл, чылажат икшырымын эртышаш. А лектышым кугемдышаш верч кертмына семын эреак тыршена. Пашаеҥна-влак деч тидым йодына гына огыл, пашалан кумылыштым нӧлталаш йӧнымат ыштена. Ялеш пеҥгыдын вожаҥышт манын, чылаштымат вольыклан шӱмаҥдена – презым шулдырак ак дене пуэна. Южышт ӧрдыктараш иктым веле огыл налыт.
Пашаеҥна-влакым шушаш У ий дене уло кумылын саламлем. Мо уда лийын, эртыше идалыкеш кодшо, а шушаш ийыште сай гына лийже – вольык озанлыкыштат, шурно ден кормам куштымаштат. Тӱҥжӧ – чылан таза лийышт, нимо ынже тургыжландаре, элысе обстановкат саемже. Тунам пашанат ушнен толеш, илышнат улаҥеш.
Владимир СМОЛЕНЦЕВ,
«Восход» СПК-колхоз вуйлатыше
Шокшем Памаш
Юрий ИСАКОВ ямдылен
Авторын фотожо
