М.Шкетан лӱмеш Марий национальный драме театрын коллективше у тургымыштат ончышыжо-влаклан икмыняр у постановкым ямдыла.
Тидын нерген театрын тӱҥ режиссёржо Роман Алексеев палдарен.
СВО-лан полыш
21, 22 февральыште артист-влак Элым аралыше-влакын кечышт вашеш «Чоҥешта турня кашта» ден «Кавасе алаша» спектакльлам ончыктат. Кок постановкыжат Кугу Отечественный сар нерген. Ужалыме билет оксам театрын коллективше СВО-што улшо салтак-влаклан полыш семын колта.
Поэт да киноактёр нерген
25 февраль театрын историешыже волгыдо кышам кода: ты кечын «Триколор» компаний сценыште ончыкталтше «Йыван Кырла. Путёвка в жизнь» спектакльым ончышо-влак дене пырля икмыняр камер дене сниматлаш тӱҥалеш. Тыге кумдан палыме марий поэт, киноактёрын илыш-корныжо да пашаж нерген пӱтынь Российыштына илыше-влак пален налыт. Спектакль-кином «Большой эфир» каналыште ончыктат.
Россий театр ушемын 150 ияш лӱмгечыжлан пӧлеклалтше кугу проект февраль гыч апрель марте эрта. Тудын дене келшышын, 17 олаште 21 спектакльым сниматлат. Россий кумдыкышто эн ойыртемалтше спектакль радамыш режиссёр Степан Пектеевын «Йыван Кырла. Путёвка в жизнь» спектакльже пурен.
Палемдыман, икмыняр ий ончыч мемнан театрыште «Салика» постановкым войзеныт ыле.
Сандалыкыште уло мо йӧратымаш?
Драматург Зинаида Долгован «Шым пуд пырче» пьесыж почеш шындыме «Маринавт-влак але Теве кушто илышет!» спектакльын премьерже 2021 ийыште лийын. Но икмыняр жап тудо сценыште ончыкталтын огыл. Космонавт-влакын Сандалыкыште илышым кычалмышт нерген постановкым режиссёр Роман Алексеев ындыжым уэмден, лӱмжым вашталтеш, сценыш луктеш. Кызыт артист-влак дене репетицийым эртарат. «Сандалык йӧратымаш» спектакльым 6 мартыште ончыктат.
– Искусственный интеллект, робот, робототехнике илышыште вияҥын толеш. Айдеме да робот коклаште могай ойыртем? Йӧратымаш – волгыдо чон шижмаш, тидым робот чыта мо? Тидым ме постановкышто пален налына, – каласыш спектакльын режиссёржо.
«Кубик Метри»
Мартыштак театрыште эше ик премьер лиеш – Зинаида Долгован «Кубик Метри» пьесыж почеш тыгаяк лӱман комедийым режиссёр Василий Домрачев ямдыла.
Ушештарыман, авторын ты произведенийже драматург-влаклан эртаралтше «Эн сай пьесе» конкурсышто икымше вер дене палемдалтын.
«Палантай»
М.Шкетан лӱмеш театрын репертуарыштыже марий талешкына-влакын илыш-корныштлан да творчествыштлан пӧлеклалтше икмыняр постановко уло. Пытартышлан, мутлан, «Колумб» спектакльым сценыш луктыныт.
Апрельыште ончышына-влак марий профессионал музыклан негызым, хоровой искусствым вияҥдымашке кугу надырым пыштыше Иван Степанович Ключников-Палантай нерген спектакльым ужын кертыт. Тудо композиторын шочмыжлан 140 ий теммылан пӧлеклалтеш. «Палантай» пьесым драматург Геннадий Гордеев возен. Спектакль мурылан поян лиеш. Музыкым Марий Эл Кугыжаныш премийын лауреатше, композитор Григорий Архипов воза.
Улыжат коктын модыт
Режиссёр Алексей Ямаев «Свободная пара» спектакльым рушла шында. Тудым цех-залыште ончыктат. Постановкышто улыжат кок артист – Павел Ефимов ден Людмила Казанцева – модаш тӱҥалыт.
Тыгак «Кай, кай Йыванлан» спектакль ямдылалтеш. Постановкысо действийым режиссёр эртыше курымын 70-80-ше ийлашкыже кусара.
Пӱртӱсыштӧ
Марий драмтеатр кава йымалне «Кеҥеж йӱд» ден «Кавасе алаша» спектакль-влакым модын ончыктен. Тений кеҥежымат, июньышто, артист-влак пӱртӱсыштӧ калыкым куандараш шонат.
– Але марте ме Морко районышто лийынна, но ты гана Йошкар-Ола воктене да Шернур районышто ончыкташ шонымаш уло, – каласыш Роман Алексеев.
«Лум кугыжа»
«Снежная королева» йомакым шындаш театрын художественный вуйлатышыже, режиссёр Василий Пектеевын шонымашыже лийын. Но тудын ӱмыржӧ лугыч лиймылан кӧра ты пашам театрын тӱҥ режиссёржо Роман Алексеев шке ӱмбакыже налын.
– Пагалыме режиссёрна, Марий Эл искусствын сулло деятельже Василий Александровичын тӱҥалме пашажым умбакыже шуйыман. Эше тунамак тудо сценографийым да костюмым ямдылыше художник-влак Сергей Таныгин да Лариса Воробьёва дене пашам тӱҥалын ыле, – рашемдыш Роман Юрьевич. – Постановкым 3D йӧн полшымо дене сӧрастараш шонена. Спектакльыште театрын артистше-влак дене пырля Палантай лӱмеш тӱвыра да сымыктыш колледжын студентше-шамычат модшаш улыт. Руш писатель-влак Ганс Христиан Андерсен ден Евгений Шварцын возымо пьесышт негызеш шындыме йомакна йоча-влаклан да нунын ача-аваштлан оҥай лийшаш. Спектакльлан музыкым композитор Светлана Яндукова воза.
Алевтина БАЙКОВА
Авторын фотожо
