Марий Эл радион хит-парадше
Йолташ-влак, тендан полшымо дене кодшо арняште мурызо-шамыч коклаштышт тыгайрак «тошкалтышым» чоҥеныт.
- Людмила ШОЙ – «Пӱрымашем»
- Анита Феоктистова – «Тый, тый»
- Вадим Краснов – «Ит ойло, ом ойло»
- Аделина Батаева – «Йӧраталын йӧратал»
- Николай Изергин – «Мландывалне лупс»
- Данил Коротков – «Тылат кӧра»
- Майя Ахметянова – «Марий радио таче мура»
- Алексей Пуртов – «Чукайлан»
- Диана Ямбаршева – «Йӧртет гын, ит чамане»
- Диана Морозова ден Александр Леонтьев – «Лач тиде омо»
Йӧратыме мурызыланда ончыл верым налашыже кузе полшышашым огыда пале гын, ушештарена: 5533 кӱчык номерыш SMS-ым колтыман. Тӱҥалтыште МАРИ мутым возыман, вара, яра верым кодыде, мурын номержым шындыман. Муро лӱмым кавычкыш налман огыл. Йӱклымаш SMS-ПОРТАЛ-ыште кая.
Морко район Изи Пумыр ялын эргыже Вадим КРАСНОВ марий эстрадыште чолга мурызо да уста гармоньчо семын шукертсек палыме. Марий такмакым муралтен колтымыж дене кумылым нӧлта. Репертуарыштыже йӧратымаш, илыш, пашаче кумылан марий ӱдырамаш, салтак да моло нерген шӱдӧ наре мурыжо уло. Икмыняржылан мутшо ден семжымат шкежак возен.
1986 ийыште 1-ше №-ан музыкально-художественный интернат-школыш тунемаш пурымекыже кугу сценыш лекташ тӱҥалын. Тунамак гармоньым шокташ тунемын. А такшым семӱзгарлан изинекак шӱмаҥын: ачаже Михаил Серафимович Краснов тале гармонист лийын. Тудын гармоньым шоктен мурымо мурылаж кокла гыч Морко вел такмакше-влакым уло кумылын калык ончылно йоҥгалтара.
– Мый 26 ий Йошкар-Олаште омсам ыштен лукшо ик организацийыште тыршем. Яра жапыште ушыш тӱрлӧ шонымаш пура, коклан почеламутат, семат шочыт. Мондаш огыл манын, тетрадьышкем вашке гына возем, – ойла Вадим. – «Ит ойло, ом ойло» муро шукерте огыл калыкыш лектын. Мутшо шкемын, а семжым татар семмастар Фирзар Муртазин возен. Тиде муро йӧратымаш нерген.
Фотом еш альбом гыч налме.
