26 апрель – Марий Талешке кече. Республикысе профессиональный искусство аланыште Калыкнан эртен толмо корныжо, Талешкыже-влак нерген постановко-влак кугу верым айлат.
Мутлан, Марий самырык театрын 1990-ше ийла тӱҥалтыште шындыме «Ӧртӧмӧ он», «Болтуш», «Мый ом суко садак» трилогийжым республикыштына веле огыл, тудын деч ӧрдыжтат ончышо-влак шокшын вашлийыныт. А «Онарын кердыже» спектакльым кызытат йӧратен ончат.
«Акпатыр» – икымше марий опер. Э.Сапаев лӱмеш опер да балет академический театрын сценышкыже тудым тӱрлӧ жапыште тӱрлӧ режиссёр луктын. Ты постановкым Килемар районышто кава йымалне ончыктымым кажне ийын калык куанен вуча. «Кӱдыратле Чумбылат» вокально-хоровой действо-мистерият марий калыкын историйыштыже кугу событий семын палемдалт кодын.
М.Шкетан лӱмеш Марий национальный драме театр калыкнан ончыл еҥже-влак: Йыван Кырла, Сергей Чавайн, М.Шкетан – нерген спектакльла дене ончышыжо-влакым куандара. «Югорно» постановкат калыкнан историйже, легендыже, мифше дене кылдалтын.
Марий Элын калык артистше Вячеслав Созоновын возымо да йоҥгалтарыме «Черемис» (семже Т.Архиповын) мурыжо марий калыкнан лӱддымӧ да патыр улмышт дене кугешнаш тарата.
29 апрель – Куштымашын тӱнямбал кечыже. «Марий Эл» кугыжаныш куштышо ансамбльын репертуарыштыже «Черемис-влак» сарзе куштымаш уло. Тудо калыкнан вий-куатшым кумдан ончыкта. Ты куштымаш дене сценыш лекме годым артист-влак шкешт мом шижыт?
Алексей САДОВИН, Марий Элын сулло артистше:
– Сарзе куштымаш марий калыкнан виян да лӱддымӧ улмыжым ончыкта. Ожно пӧръеҥ-влак пашаланат тале лийыныт, сонарышкат коштыныт.
Сценыш пикш дене лектына, тыгодым вий-куатым, пеҥгыдылыкым шижам, вет ты куштымаш лач тыгай койыш-шоктышым почын ончыкташ йӧным пуа, кугешнаш тарата.
Андрей ДМИТРИЕВ, «Марий Эл» ансамбльын артистше, репетитор:
– «Черемис-влак» куштымаш – мемнан кугешнымашна, шарнымашна. Тудын гоч ме шкенан талешкына, Марий кундемнан геройжо-влакым шарнымым ончыктена.
Ты куштымаш годым чонышто ласкалык, кугешнымаш шижалтыт, патыр марий улмына кӧргӧ гыч лектеш.
Светлана КУДРЯВЦЕВА, Олеся СТАРИКОВА, «Марий Эл» ансамбльын артистше-влак:
– Куштымаш гоч марий калыкын акрет годсо илышыже, каласен шуктыдымо шижмашыже, моторлыкшо почылтыт… Ожно пӧръеҥ-влак сонарыш коштыныт, тыге нуно шке ешыштым, сурт-оралтыштым араленыт.
Алевтина САУТОВА, «Марий Эл» ансамбльын ончычсо артистше, костюмерже:
– Куштымо годым марий кундемысе пӱртӱсын куатше, калыкнан кӧргӧ вийже, кугезе тукымнан келге вожшо шижалтыт. Тыгодымак калыкнан шке кундемжым йӧратымыже, поянлыкшым арален да тукым гыч тукымыш шуен толмыжо, пашаче кумылжо, ныжылге улмыжо раш почылтыт. Тиде куштымашым Российын сулло, Маий Элын калык артистше, мемнан ончычсо художественный вуйлатышына Славик Михайлович Асмаев шынден. Кузе тудо чыла тидым ужын, шижын да эше сценыште ончыктен моштен?! Мутат уке, тудын мастарлыкшылан ӧраш да кугешнаш веле кодеш.
А.БАЙКОВА
Фотом Маргосфилармонийын архивше гыч налме
