5,6 февральыште М.Шкетан лӱмеш Марий национальный драме театрыште В.Шекспирын «Укрощение строптивой» пьесыж почеш шындыме «Торешвате» спектакльын премьерже лиеш.
Тудым сценыш лукташ театрын тӱҥ режиссёржо Роман Алексеев ямдыла.
Артист-влак кызыт эр гыч кас марте репетицийыште улыт. Постановко гыч икмыняр кӱчык ужашым мыланнат, журналист-влаклан, кодшо кечылаште ончыктышт.
– Семён Николаевын кусарыме ты пашаже театр сценыш лукшашлык произведений-влак коклаште лийын. Мый шкеже ондак тудынак кусарыме «Лир кугыжа» пьесыж почеш спектакльым сценыш лукташ шоненам ыле. Тудо трагедий. Но театрын художественный советше «Торешвате» комедийым ойырен нале, да мый тиде материал дене пашам ышташ келшышым, – палемдыш кодшо кечылаште журналист-влаклан эртарыме пресс-конференцийыште Роман Юрьевич. – Тиде пьесе тачысе кечылан моткоч келшен толеш. Тудым сценыш лукташ артистна-влак ситышын да виян улыт. Шекспир кажне театрын репертуарыштыже лийшаш. Чыла артист тӱнямбал драматургий репертуар гыч рольым модшаш. Эн тӱҥлан мый шкеже авторын каласаш шонымыжым марий ончышылан чын намиен шукташ кӱлмым шотлем.
Спектакльыште пӱтынь гаяк труппо модеш. Артист-влакын вургемышт шинчаш вик перна. XVI курымысо илышым почын ончыктышо да тачысе кечылан келыштарыме костюм-влакым сӱретче Лариса Воробьёван эскизше почеш ямдылыме.
Постановкышто осал йылман, торжа койыш-шоктышан Катарина да тудын илышыже, тыгак пӧръеҥ ден ӱдырамаш кокласе кыл нерген ойлалтеш. Поян ӱдыр Катарина Петруччолан марлан лектеш мо? Тидын нерген лишыл жапыште, спектакльым ончымеке, пален налын кертына.
Англичан драматургын произведенийже почеш шындыме спектакль марий ончышылан мо дене келшышаш? Ты шотышто Марий театрын артистше-влак теве тыгерак каласышт:
Иван Смирнов, Российын сулло, Марий Элын калык артистше, Баптиста рольым модшо:
– Шекспир — тиде театрланат, ончышыланат пайрем дене иктак. Репертуарыште тӱнямбалне чапланыше ты драматургын пьесыже улмо театрын кугу кӱкшытшӧ, мастарлыкше нерген ойла. Тыгай спектакльыште модын, артист-влаклан шке мастарлыкыштым да уло чоныштым почын ончыкташ йӧн уло. Шекспирын произведенийыштыже чыла уло: йӧраташ гын – чот йӧраташ, сыраш гын – чот сыраш…
Артём Асмаев, Марий Элын сулло артистше, Петруччо рольым модшо:
– Шекспирым йӧраташ кӱлеш. Тудын возымыжо кеч-могай пагытланат келшен толшо, шкешотан, оҥай. Произведенийже-влак тунемме пагыт гычак чоныш пижын кодыт. Шекспирын пьесыж почеш шындыме спектакльыште модаш – кугу пиал. Шекспир манмыжак мом шога!
Текстым лудаш тӱҥалмеке, нелырак ыле, Шекспирын возымыжо кызытсе деч ойыртемалтеш. Адакшым ты произведений эн ончыч англичан гыч рушлаш, вара веле марлаш кусаралтын, садлан Шекспирын каласаш шонымыжат, очыни, мыняр-гынат вашталтын. Но ме тудым шкенан модмо гоч почын ончыктышаш улына.
Эдуард Яковлев, Марий Элын сулло артистше, Баптиста рольым модшо:
– Шекспир – тиде классике. Тыгай спектакльыште артист-влаклан модманак: тудо кушкаш, усталык аланыште вияҥаш полша. Мыскара сынан постановкышто илыш шолеш, сандене ончышо-влаклан тушто йокрок лийшаш огыл.
Павел Ефимов, Петруччо рольым модшо:
– Пӧръеҥ-влак шке ӱдырамашыштым йӧратышаш улыт. Еш илышыште тиде эн тӱҥлан шотлалтеш.
Алексей Тетерин, Грумио рольым модшо:
– Спектакльыш тудым мучашлыше монологым колышташ лийынак толман. Тушто илыш нерген моткоч чын каласыме.
Светлана Александрова, Катарина рольым модшо:
– Роль моткоч оҥай: тыглай огыл, персонажем чынже денак тореш вате. Кӱчык жапыште тудын койышыжо тӱрлӧ семын вашталтеш. Спектакльыш толшылан Шекспирын марла йоҥгалтмыжым колышташ поснак оҥай лийшаш.
Евгений Сергеев, Бьонделло рольым модшо
– Йӧратымаш верч калыкын вашталтмыже палдырна: ӱҥышыжӧ чолгарак лиеш, торешыже кутынь савырна…
Алевтина Байкова
В.Тумбаевын фотожо.
