Элыштына Россий Федерацийын Украиныште эртарыме военный спецоперацийыште вуйым пыштыше воин-влаклан мемориальный оҥа-шамычым почаш тÿҥалыныт. Патыр эрге, пелаш, ача, йолташ-влакым ночко мландыш поген пыштыме шотышто шÿм-чоным кÿрыштшö, тыгодымак нунын геройло подвигым ыштымышт, военный присяге ден сарзе порыслан мучаш марте ÿшанле улмышт шотышто нимучашдыме кугешнымашым лукшо, спецоперацийын чыла цельже ден задачыжым шуктымо шотышто кугу ÿшаным шочыктышо мероприятий-шамыч Марий Элын районлаштыжат эртат.
«Таче ме землякнам, ачам, эргым да пелашым Виктор Иерусланович Яковлевым пытартыш корныш ужатена. Тудо кугыжанышнан да шочмо кундемнан сай илышышт верч палемдыме воинский порысым геройло подвигше дене тÿрыснек шуктен. Районым вуйлатыше дене Виктор Яковлевын лÿмжым курым гыч курымыш шарнашлан мом ышташ лийме нерген мутланышна. Тиде пашам тудын тунемме школыштыжо тенияк ыштена манын шонем», – 21 мартыште Изи Кушна шÿгарлаште эртыше траурный митингыште Марий Эл правительстве председательын алмаштышыже Степан Воронцов маныт. Да тиде В.Яковлев деч посна эше кум воин-земляк шотыштат шукталтын…
6 майыште Морко районысо ныл школышто Украиныште геройла колышо патыр выпускник-шамычлан мемориальный оҥа-влакым почыныт:
- Шордÿр школышто – ефрейтор Виктор Иерусланович Яковлевлан;
- Октябрьский школышто – гвардийын старший сержантше Денис Александрович Александровлан;
- Морко посёлкысо 6-шо №-ан школышто – капитан Денис Арсентьевич Крыловлан;
- Нуж-Ключ школышто – ефрейтор Артём Игорьевич Оразаевлан.
Землякна-шамыч чыланат мартыште 4, 6, 10 да 12 числаште ÿмыр лугыч лийыныт, самырык вуйыштым мемнан тыныс илышна верч пыштеныт…
Военный спецоперацийыште лÿддымылыкым да героизмым ончыктымыштлан кажныжым Мужество орден дене палемденыт. Награде-влакым герой-шамычын ача-аваштлан, пелашыштлан торжественно кучыктеныт.
Ласкан малыза, марий патыр-влак! Ме тендам нигунам огына мондо!
М.ИВАНОВА
Интернет гыч налме фото
