Марий Элысе школлаште тунемше-влаклан У ий открыткын авторжо лияш йӧн пуалтеш. Тидлан «Сеҥымаш кожым» сӱретле» всероссийский йоча конкурсыш ушныман.
Тыгай усталык таҥасымашым Сеҥымаш тоштер, Россий почто да Оксана Фёдорован «Порым ышташ вашкыза!» поро кумыл фондшо эртарат.
1945 ийыште У ийлан иктаҥаш-влак кузе ямдыллтыныт, пайрем кожым кузе сӧрастареныт, шке кид дене ыштыме могай модышым тушко сакаленыт, кумылышт могайрак лийын – чыла тидым конкурсыш ушнышо участник-влак (7 гыч 17 ияш марте) почын ончыктышаш улыт. Открыткысе сӱрет (кеч-могай технике полшымо дене ышташ лиеш) тудо жаплан келшыше лийшаш. Негызлан кугезе коча-кова-влакын У ийым вашлиймышт нерген каласкалымым налме гын, нунын пелен нунын ойлымыштым возен колташ лиеш.
Пашам 2020 ий 25 ноябрь марте конкурсыш пуэн шуктыман. Жюри кажне категорийыште, а тудыжо кумыт лиеш – 7-10, 11-14 да 15-17 ияш-влак, кум сеҥыше гыч палемда. Нунын лӱмыштым тений 7 декабрьыште увертарат. Тыге 9 сеҥышын пашажым У ий открытке-влакын коллекцийышкыже пуртат.
Конкурс нерген утларак палаш манын, Сеҥымаш тоштерын сайтышкыже пурыза.
Палашлан, фронтовой «Сеҥымаш ёлко»1944 ий 26 декабрь гыч 1945 ий 20 январь марте Москвасе «Эрмитаж» садыште лийын. Тудым эртарыме нерген пунчалым элнан правительствыже луктын, тунам Йошкар Армий фашист-влак ваштареш вес эллаште кредалын.
Г.КОЖЕВНИКОВА
