Верховный судын судьяже, аппарат пашаеҥ да суд системын ветеранже-влакым юбилей дате дене республик вуйлатыше Александр Евстифеевын лӱмжӧ дене Марий Эл правительстве председательын икымше алмаштышыже Сергей Сметанин саламлен, палдара Марий Эл Республик вуйлатышын мер кыл да увер управленийже.
«Тендан пунчалда дене еҥ-влакын пӱрымашышт, обществын могай улмыжо, кугыжанышын чапше кылдалтыт. Тендан пашадан ийкойыш, ласкалыкыш шумаште, порядкым ыштымаште кӱлешлыкше моткоч кугу», — ойлалтеш Марий Эл вуйлатышын саламлымаштыже.
Сергей Сметанинат ведомствын коллектившылан сай паша лектышыш, у профессиональный кӱкшытыш шуаш, шындыме цель ден задачым шуктымаште пеҥгыдылыкым ончыкташ да тазалыкым, пиалым тыланен.
Марий Эл Республикын Верховный судшо 1923 ий 26 январьыште ышталтын. Тунам Марий областной суд шочын.
Марий Эл Республикын Верховный судшын председательже Александр Давыдовын палемдымыж почеш, кызыт тиде органыш Верховный судын президиумжо, уголовный, гражданский да административный дела-влак шотышто судебный коллегий-влак пурат. Кажне коллегийыште судебный состав ышталтын.
Ойыртемалтше пашаеҥ-влаклан пайрем кечын тӱрлӧ наградым кучыктеныт.
Л.Камалетдинова.
