Гороскоп

29 апрель — 5 майлан гороскоп

Шорык

Тиде арнян шкендам еҥ-шамыч дене тыматлын кучаш тыршыза, уке гын пытартыш жапыште кугешнылме койышда чӱчкыдын палдырнаш тӱҥалын. Шарныман: весе-влаклан удам ыштен, те эн ончычак шканда удам ыштеда. Нине кечылаште вашлиймаш-влаклан ямде лийза.

Презе

Шӱдыр-влак тыланда кызыт пашам «шокшым кергалтен» ышташ темлат. Молан манаш гын нине кечылаште ыштыме ойпидыш кугу пайдам конден кертеш. Иктаж нелылык лектеш гынат, чын корным муыда. Тазалыкым эскерыман.

Йыгыр

Арня тӱҥалтыш куштылгыжак огеш лий. Пашам шуко ышташ логалеш гынат, чытышым ончыктыман, шкем ласкан кучыман. Полыш кӱлмыла чучеш гын, йодаш ида аптыране. Лишыл еҥ-шамычын полышыштлан эҥертеда гын, вий-куат утларак ешаралтмым шижыда.

Рак

Ала-могай паша утларак оҥайла чучеш да тудлан гына кугу тӱткышым ойыреда гын, нелылыкыш логалын, эсогыл шийвундыдам йомдарен кертыда. Тиде арня унала каяш але йолташ-шамычым шке деке ӱжаш келшыше лиеш. Ӱдырамаш-влаклан тӱжвал сыным вашталташ темлалтеш.

Лев

Иктаж-кушко путешествийыш кайынеда гын, тугеже билетым налаш кызытак миен толман. У оҥай еҥ-шамыч дене вашлиймаш вуча. Шӱм пелаш денат палыме лияш йӧн лектеш. Тыгодым окса шотышто нелылык лектын кертеш.

Ӱдыр

Тиде арнян туге чучаш тӱҥалеш, пуйто пиал тыланда поснак шыргыжеш. Молан манаш гын изирак нелылык-влак шке семыныштак да куштылгын кораҥдалташ тӱҥалыт. Но тидлан утыжым ида ӱшане. У еҥ дене палыме лияш огеш темлалт.

Виса

Кызытсе жап гыч илышыштыда куанле пагыт тӱҥалеш. Тидыже йӧратыме еҥым вашлийме дене кылдалтеш, очыни. Мӧҥгыштӧ ыштышаш сомыл ятыр погынен гын, тудым варалан кодыман огыл. Лишыл еҥ-влак дене пӱртӱсыш лектыда гын, кылда эшеат пеҥгыдемеш.

Скорпион

Нине кечылаште кугу тӱткышым тазалыклан ойырыман. Мӧҥгыштат, пашаштат утыш лекше ӱзгар ден арвер-влак деч утлыман, илышыш у шӱлышым пуртыман. Южыштлан кугурак должностьым темлен кертыт. Тыге ончыкыжым шийвундыда ешаралтеш.

Пикшызе

Тиде арня у шинчымашым налаш келшыше лиеш. Нине кечылаште пашам кыртмен ышташ перна, сандене тидлан ямдылалтса. Каныш жапым утларакше еш дене эртараш тыршыза. Тыге икте-весе кокласе кылда эшеат куандарыше лиеш.

Ирказа

Нине кечылаште пашам шагал огыл ышташ перна. Но утыжым кугу чолгалыкым ончыкташ тыршаш нимолан. Иктаж у сомылым темлат гын, кӧнымӧ деч ончыч сайын шоналтыман. Каныш кечылаште иктаж-кушко миен толза.

Вӱд йоктарыше

Те вашталтмыдам, шкан утларак ӱшанаш тӱҥалмыдам шижыда. Тидыже кеч-могай пашамат молгунамсе деч куштылгын ышташ полша. У еҥ-влак дене палыме лияш йӧн лектеш гын, тореш ида лий, молан манаш гын ончыкыжым нуно уло илышдам сай велыш вашталтен кертыт.

Кол

Тиде арнян тӱрлӧ улан ямде лийза. Тыгодым ондакысе шӱмбел шкеж нерген ушештара да уэш кылым ышташ темла, очыни. Тореш ида лий, молан манаш гын ончыкыжым чылажат куандараш гына тӱҥалеш. Тиде кыл ешым чумырымо мартеат шуктен кертеш.

 

Ӱпым пӱчкаш тарваненда гын

29 апрель. Таче ӱпым пӱчмӧ эшеат моторрак лияш, шийвундым ешараш полша. Ӱпым ошалге ден шӧртнялге тӱсыш гына чиялташ темлалтеш.

30 апрель. Тиде кечын ӱпым пӱчкыда гын, иктаж-могай кугу сатум налыда. Тыгодым уто нелытым погымо лӱдыкшӧ уло. Ӱпым натуральный гай койшо тӱсыш веле чиялташ келшен толеш.

1 май.  Ӱпым пӱчманат, чиялтыманат огыл, уке гын илышыштыда иктаж-мо уда лийын кертеш.

2 май. Ӱпым пӱчмӧ деч вара тазалык тургыжландараш тӱҥалме лӱдыкшӧ уло. Ӱпым шемалге тӱсыш чиялтеда гын, пашаште кугу сеҥымашыш шуыда.

3 май. Таче ӱпым пӱчмеке, тазалык лунчырген кертеш. Ӱпым чиялтеда гын, еҥ-влак дене вурседылмаш марте шуаш тӱҥалыда.

4 май. Ӱпым пӱчмӧ деч вара депрессий авалтен кертеш. Ӱп тӱс дене экспериментым эртараш лиеш.

5 май. Тиде кечын ӱпым пӱчкыда гын, чоныштыда ласкалыкым шижыда. Ӱпым молгунамсе деч ойыртемалтше тӱсыш чиялтеда гын, тазалыкда пенгыдемеш, оксада ешаралтеш.

Л.Камалетдинова

Авторын фотожо

Опубликовать в Одноклассники

Добавить комментарий