Марий Эл правительствын черетан заседанийыштыже социальный контракт негызеш кугыжаныш социальный полышым пуымо йодышым лончыленыт.
Регионын паша да социальный аралтыш министржын икымше алмаштышыже Эдуард Загрутдиновын увертарымыж почеш, 2025 ийыште республикыштына 1532 социальный контрактым ыштыме, утларакше – «Пашам кычалмаш» (611 ойпидыш) да «Шке амалкалче пашам шуктымаш» (638) направленийла дене. 62 еҥ шке подсобный озанлыкым кучаш полышым налын, моло мероприятийлан – 221 граждан. Роскот 286 миллион утла теҥгеш шуын.
2026 ийыште 1593 контрактым ышташ палемдыме. 1 сентябрь марте тиде йӧн дене ик тӱжем еҥ пайдаланен: 496 граждан пашам кычал муаш полышым налын, 382 – шке пашам почаш, 51 – подсобный озанлыкым кучаш, 71 – неле илыш йыжыҥыште илен лекташ.
Лӱмын эртарыме сарзе операцийын участникше-влаклан посна тӱткыш ойыралтеш. 1 сентябрь йотке 45 еҥ полышым йодын толын, да 35 ойпидышым ыштыме: 33 – СВО участник-влак дене, 2 – пелашышт дене. Лишыл жапыште эше кум йодмашым ончаш палемдыме. Паша да социальный аралтыш министерстве ден тудын ведомствыштыжо улшо орган-влак «Защитники Отечества» кугыжаныш фондын Марий Элысе филиалже да республикысе «Бизнес-инкубатор» дене пеҥгыде кылым кучат.
Социальный контрактлан пашам кычалше шуко еҥ эҥерташ тӱҥалын, тылеч посна моторлык аланыште шке пашам почаш шонышо-шамыч деч шагал огыл йодмаш пурен – тыгай шотан ойпидыш-влак неле илыш йыжыҥ гыч чынжымак лекташ полшат, палемден Эдуард Загрутдинов.
Марий Элым вуйлатыше Юрий Зайцев калыкым социальный контрактын пайдалыкше да тудым налме йӧн дене кумдан палдараш каласен.
Ушештарена, социальный контрактым тӱнен илыше еш ден 2026 ийыште тылзыште 16 666 теҥге деч шагал доходан шкет илыше граждан-влак налаш праван улыт. Тиде идалык гыч тыгай полышым лӱмын эртарыме сарзе операцийын участникше-влакланат: пашам ситарыме рӱдерын учётышкыжо пашадыме але пашам кычалше семын шогалше боевой действийын ветеранже, тыгак СВО-н демобилизоватлыме участникше – I да II группо инвалид, рӱдерын учётышкыжо налме боевой действийын ветеранже-шамычын пелашыштлан ойыраш тӱҥалме.
Социальный контрактым ныл направлений дене ышташ лиеш: пашам кычалаш, шке пашам почаш, шке подсобный озанлыкым кучаш да неле илыш ситуаций гыч лекташ.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
