Марий парламентым вуйлатыше Михаил Васютин Козьмодемьянск ола да Курыкмарий район администраций-влакын вуйлатышышт дене вашлийын.
11 мартыште Марий Эл Кугыжаныш Погынын председательже Михаил Васютин Козьмодемьянск олашке сайлыше-влакын наказыштым 2027 ийлан чумырымо пашам виктарен колтымо йодыш дене миен.
Паша визитше годым тудо Курыкмарий муниципал районысо депутат-влак погынымашын черетдыме сессийыштыже лийын.
Тушто конкурсым иктешлыме почеш Курыкмарий район администрацийым вуйлатышын должностьышкыжо Сергей Першуткиным пеҥгыдемденыт. Тылеч посна муниципал образованийын 2026-2028 ийласе бюджетышкыже вашталтышым пуртеныт да районым муниципал округыш савырыме шотышто публичный колыштмашым иктешленыт. Районысо калык реформым сайлан шотлен, да ынде Кугыжаныш Погыныш законын проектшым ямдылаш тӱҥалыт.
Сессий деч вара Михаил Васютин Козьмодемьянск ола округ да Курыкмарий район администраций-влакын представительышт дене совещанийым эртарен. Тушто тыгак Марий Элым вуйлатышын советникше Лев Покровский, Кугыжаныш Погынын депутатше-шамыч Светлана Громова, Михаил Родионов, Сергей Ильин, оласе да районысо депутат-влак погынымашлан председательышт Игорь Волков ден Евгений Смелов лийыныт.
Совещанийыште калык деч пурышо йодмаш-влакым погымо шырым нерген мутланеныт. Кугыжаныш Погынын депутатше-шамыч 1 апрель марте парламентыш верысе калык, депутат да администраций-влак дене пырля чумырымо темлымашлам пуышаш улыт. Кызыт тиде паша чыла округышто поснак талын шукталтеш: парламентарий-влак, кумдыклаште поснак пӱсын шогышо йодышлам шотыш налаш манын, паша коллектив-шамыч да калык дене вашлийын мутланат.
«Ме умылышаш улына: кажне наказ – айдемын але илемын проблемыже, да мемнан задачына – тудым сайын да жапыштыже кораҥдаш манын, мо лиймым, чыла ышташ», – палемден Михаил Васютин.
Кугыжаныш Погынын председательже Козьмодемьянскыште тений калыкын темлымыж почеш тӱзаташ палемдыме объект-влакым ончен. Иктыже – «Сияние» техносквер. Ола покшелне чара верыште чоҥымо объект Козьмодемьянскын ик эн мотор кумдыкышкыжо савырнен. Тудо поснак оласе молодёжьлан келша. Аллей да тротуар мучко вераҥдыме понар ден тул диодан светильник-влак кумдыкым веле огыл, архитектур сооружений ден пайдале кумдык-шамычымат ойырен волгалтарат. 2026 ийыште тыште икмыняр светильникым вашталташ палемдыме.
Михаил Васютин ола администрацийын зданийже деч Я.Эшпай лӱмеш Калык тӱвыра рӱдер марте шуйналтше корным олмыктымо шырым дене палыме лийын, Комсомольский уремыште автобус павильоным вераҥдыме пашан качествыжым аклен.
Парламентым вуйлатышын мутшо почеш, сайлыше-влакын наказышт дене ыштыме паша кумдыкым тӱзатыме пӱсӧ йодыш-шамычым адресно да сайын решатлаш полша.
Маргарита ИВАНОВА.
Марий Эл Кугыжаныш Погынын пресс-службыжын фотожо.
