Марий Элыште пеҥгыде коммунал торым утилизироватлыме ныл у объектым чоҥаш палемдыме.
Регионым вуйлатыше Юрий Зайцев Россий правительстве председательын алмаштышыже Дмитрий Патрушевын эртарыме совещанийышкыже видео-конференц-кыл йӧн дене ушнен. Мутланымаш пеҥгыде коммунал тор дене кылдалтше пашам ворандарен колтымо нерген лийын.
Марий Элыште кажне ийын 159 тӱжем тонн наре куштыра погына. Таче кечылан тудым тойымо шотышто йодыш лектын огыл – республикыштына 13 полигон уло. Но шӱкым тӱрыснек ойыраш куат эше ок сите: тиде паша кок комплексыште гына шукталтеш.
«Ситыдымашым кораҥдышашлан регионыштына «Экологический благополучий» национальный проектын полшымыж дене ныл у объектым: Йошкар-Олаште, Шернур ден Волжский округлаште торым ойырымо комплекс-влакым, Медведево районышто комплексный объектым – чоҥаш палемдыме», – рашемден Юрий Зайцев.
Республикым вуйлатышын мутшо почеш, Йошкар-Олаште да Шернурышто объект-влак палемдыме жап деч вараш кодын чоҥалтыт. Амал ончычсо генеральный подрядчикын пашам шуйкалымыж дене кылдалтын. Концессионер-шамыч тудым вашталташ пунчалыныт – ынде тиде пашам вес подрядчик шукташ тӱҥалеш. У компаний ончылан задачым шындыме: объектым палемдыме жаплан чоҥен шукташ.
Марий Элым вуйлатышын пресс-службыжын уверже негызеш Маргарита ИВАНОВА ямдылен.
