Медведево районысо Пурсанур (Кузнецово) селаште тылын труженикше да сарын икшывыже-влаклан шарныктышым почыныт.
Торжественный мероприятийыште регионым вуйлатыше Юрий Зайцевын кӱштымашыж почеш правительстве председательын алмаштышыже, финанс министр Алексей Торощин лийын. Шарныктышым ямдылаш «Семеновский» ЗАО полшен. У мемориалым почмашке предприятийын пашаеҥже да Пурсанур селаште илыше-влак толыныт. Алексей Торощин республик вуйлатышын саламлымашыжым лудын да палемден: Кугу Ачамланде сар годым селаште илыше-влак паша героизм примерым ончыктеныт.
«Пӧръеҥ-влак кокла гыч шукынжо фронтышто кредалыныт, тылыште нунын верыштым ӱдырамаш, шоҥгыеҥ да ийготыш шудымо ӱдыр ден рвезе-влак налыныт. Нуно фронтлан кочкышым веле огыл ситареныт, тыгак танк ден самолетым ышташ средствам погеныт, оборонын кӱлешлыкшылан чодырам ямдыленыт. Таче паша чапым «Семеновский» племзавод» ЗАО – республикнан аграрный отрасльжын флагманже – шуя. Предприятий шӧрым ыштен налмаште да сай урлык вольыкым ашнымаште веле огыл эн ончылно кая, тыгак икшырымлык, качестве да пашалан ӱшанле улмыж дене ойыртемалтеш» – шке саламлымаштыже палемден республик вуйлатыше.
Республик правительстве председательын алмаштышыже, финанс министр Алексей Торощин мемориал комплексым чоҥымаште тыршыше-влаклан тауштен да палемден: ветеран-влакын подвигышт нигунамат ок мондалт.
Снимкыште: мемориалым почмо годым.
Денис Речкинын фотожо
