25 мартыште Нижний Новгородышто «Единый Россий» партийын Юл кундем федеральный округысо «Есть результат!» отчётно-программный форумжо эртен.
Мероприятийын тӱҥ темыже кушшо тукымым вияҥдымаш да тудлан полшымаш лийын.
Марий Элын делегацийжым республик вуйлатыше, «Единый Россий» партийын Марий Элысе региональный пӧлкажын секретарьже Юрий Зайцев вуйлатен.
Мероприятий Юл кундем федеральный округысо чыла регион гыч депутат, меръеҥ, эксперт да кучем орган-влакын еҥыштым ушен.
Форумышто «Единый Россий» партий Калык программым илышыш пуртымо эн тӱҥ лектыш-влак дене палдарен. Участник-влак уэмдыме Калык программыш шушаш 5 ийлан темлымаш-влакым чумыреныт.
Пленар заседанийын спикерже-влак партийын Генеральный советшын секретарьже Владимир Якушев, Россий правительстве председательын алмаштышыже Дмитрий Чернышенко, РФ Президентын Юл кундем федеральный округышто полномочный представительже Игорь Комаров лийыныт.
Шке выступленийыштыже Владимир Якушев «Единый Россий» партийлан кушшо тукым верч азапланымаш патриотизмын ик эн кӱлешан формыжо манын палемден. Партий студент-влакын илыме тӱшкагудыштым капитально олмыкташ темлен да ты паша кузе шукталтмым контрольышто куча. Элнан президентше Владимир Путинын кӱштымыж почеш 2030 ий марте 800 зданийым уэмден тӧрлатышаш улыт.
Ик тылзе жапыште гына естьрезультат.рф. сайт гоч Калык программыш 20 тӱжем наре темлымаш пурен.
Дмитрий Чернышенкон ойлымыж почеш, «Молодёжь да йоча-влак» национальный проект ты партийын тӱҥалтышыж почеш шукталтеш. Тудын негызшылан еҥ-влакын темлымашыштым налыныт.
РФ Президентын Юл кундем федеральный округышто полномочный представительже Игорь Комаров «Единый Россий» партийын Калык программыжын шонымашыже-влак национальный проект-влакын цельышкышт шушашлан ик инструментше семын лийыныт манын палемден. Тиде – мемнан элым вияҥдыме раш план. Тудо РФ президент Владимир Путинын темлымыж почеш илышыш пурталтеш.
Марий Эллан тиде направлений – ик эн ончыч шуктышашлык. Юрий Зайцевын палдарымыж почеш, республикыште пытартыш ийлаште 36 школым олмыктымо, 2026 ийыште эше 16 школым олмыкташ палемдалтеш. Кыдалаш профессионал шинчымаш системе вияҥеш. 4 «Профессионалитет» кластер пашам ышта. Тушто 2 тӱжем утла студент йодмашан специальность-влак дене тунемеш.
«Регион для молодых» программылан кӧра самырык-влаклан у кумдыклам ышташ да мероприятий-влакым эртараш 317 миллион утла теҥге ойыралтын.
Форумын тӱҥ событийже партийный билет-влакым торжественно кучыктымаш лийын. Марий Эл гыч тудым Специальный военный операцийын ветеранже-влакын республикысе ассоциацийжын председательже, «Единый Россий» партийын региональный политсоветшын президиумжын еҥже, «Герои Марий Эл. Талешке-влак» регионысо кадр программын участникше Роман Возняклан кучыктеныт.
Тиде радамыште тыгак Российысе боксёр, Российын кум гана, Олимпийский модмашын кок гана, Европын кок гана да тӱнямбал чемпионжо, Российын сулло спорт мастерже, «Здоровое общество» толкынын вице-председательже Олег Саитов лийын.
* * *
Марий Элын делегацийыштыже Кугыжаныш Погын председатель Михаил Васютин да марий парламентын икмыняр депутатше лийыныт. Нуно тӱрлӧ йодыш дене эртаралтше йыргешке ӱстел-влакын пашашкышт ушненыт. Депутат Мария Дорогова «Время молодых: территория возможностей, реальные дела» площадкыште самырык-влакын политикыштын тӱҥ направленийышт дене ыштыше коммерческий огыл организаций-влакын правовой статусышт шотышто шке темлымашыжым ойлен.
Любовь Камалетдинова
