13 августышто Килемар район Арде ял шотан илемын «Поста сир» курыкыштыжо «Кугезе мланде» фольклор да этнографий фестиваль-форум эртаралтеш. Тудо Российысе калык-влакын тӱвыра поянлыкыштын идалыклан пӧлеклалтын.
Программе почеш фестиваль-форумышто творческий коллектив-влак шкеныштын усталыкышт дене калыкым куандарат, мастар-влак кидпашаштым выставкыш чумырат да мастер-классым ончыктат, куштымаш-мурымаш, спорт да модмо площадке-влакым ямдылат, пайремыш толшо кажне еҥ национальный кочкышым тамлен кертеш – икманаш, мероприятий кумда лийшашым сӧра. Ушештарена, «Кугезе мланде» 2008 ий гычак тӱҥалтышым налын, ий еда шуко калыкым чумыра, Юл кундемыште илыше-влакын шонанпыл гай тӱрлӧ тӱсан тӱвыра поянлыкыштым почын пуа.
Фестиваль-форум Марий Элын Тӱвыра, печать да калык-влакын пашашт шотышто министертсвыжын полшымыж дене эртаралтеш.
Л.СЕМЕНОВА
