Марий Элын Тазалыкым аралыме министерствыжын палдарымыж гыч, 16 апрельыште республикын стационарлаж гыч у коронавирус инфекций деч паремше 22 пациентым мӧҥгӧ колтеныт: Йошкар-Оласе больницын инфекционный отделенийже гыч -19 еҥым, Йоча республиканский клинический больнице гыч – кок икшывым, Медведево районысо рӱдӧ больнице гыч – ик ӱдырамашым.
Республикын стационарлаштыже коронавирус дене черланымым пеҥгыдемдыме диагнозан да инфекций дене авалталтын кертыныт манын шонымо 163 пациент эмлалтеш.
17 апрель эрдене Йошкар-Оласе больницын инфекционный отделенийыштыже 126 еҥ эмлалтын. 42 пациент неле состоянийыште, 84 еҥын тазалыкшым «нелылыкын кокла йыжыҥже» семын аклат. Кок черле шодым искусственно вентилироватлыме йӧн дене шӱла, 60 пациентлан кислород кӱлеш.
Йоча республиканский клинический больницыште вич икшыве кия. Ныл пациент шкенжым сайын шижеш, ик йочан состоянийже «нелылыкын кокла йыжыҥже» семын аклалтеш.
Звенигово районысо рӱдӧ больницыште ик еҥ кия, тудо шкенжым сайын шижеш.
Козьмодемьянск межрайонный больницын инфекционный отделенийыштыже коронавирус дене авалталтын кертыныт манын шонымо индеш пациент кия, черле-влакын состоянийышт «нелылыкын кокла йыжыҥже» семын аклалтеш.
Волжск оласе рӱдӧ больницын инфекционный отделенийышкыже коронавирус дене черланен кертше шым пациентым пыштыме. Нунын состоянийышт «нелылыкын кокла йыжыҥыштыже». Кок черле кислород полшымо дене шӱла.
Марий Турек районысо рӱдӧ больницын инфекционный отделенийыштыже шым пациент кия. Черле-влакын тазалыкыштым «нелылыкын кокла йыжыҥже» семын аклат. Кок еҥлан кислород кӱлеш.
Медведево районысо рӱдӧ больницын коронавирусан пациент-влаклан хирургический да акушерско-гинекологический профилян медицине полышым пуымо отделенийыштыже кандаш пациент эмлалтеш. Ик еҥлан кислород кӱлеш.
М.ИВАНОВА
