21 декабрьыште эртыше Марий Эл вуйлатышын ёлкышкыжо погынышо икшыве-влакым республик вуйлатыше Александр Евстифеев саламлен, увертара Марий Эл вуйлатышын организаций да аналитике виктемже.
Республикысе курчак театрыш кундемнан чыла районжо гыч шуко шочшан да неле илышыш логалше ешла гыч, тунеммаште ойыртемалтше, спортышто, мер илышыште чолгалыкым ончыктышо 200 утла ӱдыр-рвезе чумырген. Йоча-влакым Йӱштӧ Кугыза, Лумӱдыр, Снежная королева йомак тӱняш пуртеныт, модыктеныт.
– Марий Эл правительстве тыгай сынан ёлкым кокымшо ий почела эртара. Тудо ынде йӱлашке пурен шуын. Те, икшыве-влак, икте-весым умылышаш, ваш-ваш полшышаш улыда, а республикым вуйлатыше-влак ден педагог-шамычынт ӱҥ шонымашышыт – тендам поро шӱлышеш кушташ. Чыладам У ий дене, – каласен А.Евстифееев да ньога-влаклан тамле пӧлекым кучыктен.
Л.ШАБДАРОВА.
