Волжск олалан – 85 ий
«Ариада» ЗАО
Нелым сеҥен, уэш йол ӱмбаке
Кум ий ончыч «Ариада» ЗАО кугу вашталтыш лондем ончылно шоген. Генеральный директор Александр Владимирович Ивановын вуйлатыме у командылан неле задачым шукташ кӱлын – предприятийым кризис гыч лукташ, заказ ситыдымым да финанс чӱдылыкым сеҥен лекташ. Тидын нерген генеральный директорын коммерческий йодыш дене алмаштышыже Айрат Наилевич Натфуллин каласкала.
Ончыкылыкыш савыртыш
Уэш йол ӱмбаке шогалме икымше ошкыл семын кугыжаныш кугу проектлашке ушнымым ончыкташ лиеш. Предприятий «Восточный» космодромым чоҥымо дене кылдалтше обороно заказым шукташ пижын. Тушто мемнан специалистна-влакын кӱртньӧ конструкцийым да сэндвич-панельым ыштыме мастарлыкышт кӱлеш лийын.
Йодмаш гыч – шке ыштымашке
Вес элла гыч кондымо олмеш шкенан дене ыштымашке виктаралтше программе предприятийын историйыштыже посна лаштыкым почын. Ончыч ӧрдыж гыч шупшыктымо гын, ынде конструктор ден инженерна-влак фальшпол продукцийым шке ямдылаш тунем шуыныт. Тиде мутшо, кӱварыш коммуникацийым шараш йӧнан лийже манын, конструкций ӱмбач плитке дене леведме ешартыш кӱварым ончыкта. Икмыняр пачаш тергыме деч вара продукцийна качестве шотышто кӱлешан чыла сертификатым налын да тыге федерал кӱкшытан проектлашке ушнаш шке праважым пеҥгыдемден.
Шкешотан рекорд
Производствына ынде кум ий почела 30 процентлан кушкын толеш – тидыже ойырен налме корнынан чын улмыжым ончыкта. Пашаче ешна ты вашталтышым нӧлтшӧ кумылын вашлийын, а производство кушмаш пашадарым нӧлталаш полшен.
Йӧнна кумдаҥеш
Кодшо ий гыч у йӧнлан эҥерташ тӱҥалме. Предприятийна рынкылан ешартыш услугым шарен колтен:
– порошок йӧн дене чиялтена,
– гальванике йӧн дене леведына,
– пластмасс изделийым луктына.
Рынкыште – ончылно
«Ариада» ЗАО йӱкшыктарыше оборудованийым регионыштына ик эн шуко луктеш. Тылзыште предприятийна агрегат дене комплектоватлыме 1000 утла единице тыгай техникым – йӱкшыктарыше шкафым, витриным, ларь-бонетым, камерым – ямдыла.
Пашаеҥ-влак верч тырша
Ме палена: пашаеҥ-влак шке моштымашыштым тӱрыс ончыктен кертышт манын, кажныштлан келшыше условийым ыштыман. Предприятийыштына нунылан полшымо системым шыҥдарыме:
– кочмылан тӱлалтеш,
– пашашке да мӧҥгыш транспорт шупшыкта,
– пашам ыштыме график кӱлеш семын келыштаралтеш,
– пашаште келшыше условий ышталтеш.
Кажне пашаеҥ компанийнан тудын верч улмыжым шижше, пашажым тӱрыс куатын да пайдалын ыштен кертше манын тыршена.
У пагыт – у стандарт
Таче «Ариада» ЗАО – писын вияҥ толшо да кумда йӧнан предприятий. Ме рынкым эскерена веле огыл, тыгак шке отрасльыштына качестве да ӱшанлык шотышто у стандартым шочыктена. Ариада – тиде моторлык да ӱшанлык!
Мемнан корнына – тиде чын ойырен налме ончыкылык, командынан профессионал улмыжо да шке вийжылан ӱшанымыже, илыш йодмашым йӧныш савырен да компанийнам у кӱкшытыш нӧлталын кертмышт нерген историй.
Иктешлымаш
«Ариада» ЗАО тиде бизнес-кейс гына огыл. Тиде пашашке кажне кечын толшо, чапле продукцийым ыштыше да предприятийым вияҥдыше еҥ-влак. Команде ончыктен: профессионал семын тыршен ышташ гын, эн нелыштат сеҥымашке шуаш лиеш.
Таче ме ончыко ӱшан дене ончена: компанийна у йодмашлан да сеҥымашлан ямде.
Юрий ИСАКОВ.
Снимкылаште: администраций зданий; йӱкшыктарыше оборудований – кевытыште; ларь участке бригадир Михаил Силантьев; ПУ оператор Мария Герасимова; слесарь Александр Андреев.
Авторын да предприятий деч налме фото.
