12 февральыште Марий кугыжаныш университет Россий кӱкшытан XV Науко фестивальыш ӱжеш.
Тудын кышкарыштыже «Знание» Россий обществын эскерыше советшын заседанийже, тӱрлӧ мастер-класс-влак лийыт, тыгак погынышо-шамыч «Инноваций ончыкылыкыш жап вошт!» интерактивный ончер дене палыме лийын кертыт.
Фестивальыште Юл кундем кугыжаныш технологий университет ландшафт архитектур объект-влакын макетыштым, чодыра пашалан тренажёр-симуляторым, «Белый кот» пилотдымо транспорт платформым да моло у разработкыжо-влакым ончыкта.
Марий кугыжаныш университетын площадкыже естественно-научный да космос, Сеҥымаш дене кылдалтше шымлымаш-шамыч дене палдара.
Межрегиональный открытый социальный университет психологий, медицине, юриспруденций дене площадке-шамычын пашаштым, тыгак криминологий дене мастер-классым ончыкта.
Йылмым, литературым да историйым научнын шымлыше В.М.Васильев лӱмеш марий институт «Ийла вошт шинчаончалтыш: учёный-влак сар нерген», «Марий кундемын археологий поянлыкше» площадке-шамычым темла.
Талантан йоча-влаклан полышым пуышо «Волгенче» регионысо рӱдер тунемше-влакын усталык презентацийышт дене палдара.
Йошкар-Оласе технологий колледж мемнан элыште ыштен лукмо квадрокоптер типан пилотдымо чоҥештылше аппаратын ойыртемже нерген каласкала.
Фестиваль тылзе мучко шуйна да уло республикнам авалта.
Галина Кожевникова
Фотом Марий Эл Образований да науко министерствын сайтше гыч налме
