Марий Эл верч йӱклыза!
«Илеть», «Таир» да молат
Марий Эл Республик Россий мучко эртаралтше ДОСТИЖЕНИЯ.РФ просветитель акцийыш ушнен. Федерал флатформышто чумыр Российысе поснак кугу сеҥымаш-влак ончыкталтыныт. Марий Элым почын ончыктышо да Достижения.рф сайтыште йӱклаш темлыме 11 сеҥымаш кокла гыч индешымшыжым «Торгайыме-йӱкшыктарыме оборудованийым ыштымаш» манме да туштак эн кӱкшӧ тӱнямбал стандартлан келшен толшо продукцийым ыштен лукмым палемдыме. А тыгай продукцийым республикыштына ик эн ончыч «Марихолодмаш» предприятий ямдылаш тӱҥалын.
«Марихолодмаш» торговый маркын историйже 1941 ийыш пӧртылта. Тунам кызытсе завод олмыш Киров ола гыч торгайыме оборудованийым ыштыше предприятийым эвакуироватлыме. Но у завод сар жапыште тыгай ӱзгар дене пырля эше снарядым луктын.
1960 ий гыч тӱҥалын кызытсе марте «Марихолодмаш» завод кӱкшӧ качестван торгайыме-йӱкшыктарыме оборудованийым ямдыла. Элыштына ик эн ончыч лачак тыште йӱкшыктарыше шкаф ден камерым ышташ тӱҥалыныт, да нуно торговльышто кумдан кучылталтыныт. «Марихолодмаш» торговый маркан продукций дене Кремльысе съезд дворец да Останкино башньысе ресторан гай кӱлешан объектлам оборудоватленыт.
Предприятий ыштыме ийлаште торгайыме-йӱкшыктарыме у деч у оборудований-влак шочыныт. 1970 ийыште лукташ тӱҥалме «Таир» витрине ятыр пачаш уэмдалтме деч вара тачат клиент-влакым савыра.
Кызыт «Марихолодмаш» торговый маркан продукцийым «Контакт» АО луктеш. Тудо предприятийлан негызым пыштыше-влакын сай йӱлаштым арален коден веле огыл, тыгак продукцийын качествыжым саемден да ассортиментшым пойдарен.
Таче «Контакт» АО кызытсе жаплан келшыше тӱрлӧ тыгай оборудованийым ыштен луктеш. Рынкыште «Илеть», «Таир», «Нова», «Купец» да «Veneto» гай йӱкшыктарыше витринылам ужаш лиеш.
2012 ийыште завод кокла температуран «Капри» йӱкшыктарыше шкафым лукташ тӱҥалын. Тидлан Италий гыч лӱмын металлым обрабатыватлыме Salvagnini да йӱкшыктарыше шкафым лукмо Meccanica линийлам налме да пашаш колтымо.
Предприятий таче йӱкшыктарыше шкаф ден витринылам веле огыл, тыгак йӱкшыктарыше прилавке ден торгайыме стелажлам, кассовый бокс ден бонетлам ыштен луктеш.
Палыза: мемнан продукций верч йӱклен, Марий Эл верч йӱкледа!
Ю.ИСАКОВ ямдылен
Фотом заводын сайтше гыч налме
