Кажнын надырже шерге
Марий Турек районысо ялозанлык предприятий-влакын коллективышт, тыгак фермер-шамыч СВО-ш черетан гуманитар полышым колтеныт.
Район администрацийын ялозанлык отделжым вуйлатышын алмаштышыже Юрий Бочаров тыге манеш:
– Кызыт районысо кажне еҥ, специальный военный операцийыште сеҥымашым лишемдаш манын, шке надыржым пышта. Тиде мер паша деч тӱшка ден фермер озанлык-влакат ӧрдыжеш кодын огытыл, гуманитар полышым колташ оксам погеныт, салтакна-влаклан кӱлшӧ тӱрлӧ ӱзгарым налыныт.
Марий Элысе фермер-влакын ассоциацийыштым вуйлатыше, тиде районысо Марий Пыламарий кундемыште кресаньык озанлыкым вияҥден колтышо, ончычсо тӱшка озанлыкын комплексшым тӱкан шолдыра вольыкым ончаш келыштарыше фермер Е.Михеев погымо чыла ӱзгарым Украиныште служитлыше салтак-влаклан намийыше коклаште лийын. Тудо тыге каласкала:
– Полышым погымо акцийыш «Колос», «Акпарс» агрофирме, «Мари-Куптинский», «Китнинский», «Хлебниковский», «Ладога», «Марий Турек шӧр комбинат» ООО-влак чолган ушненыт. Чумыр пӧлекым наҥгаяш прицепан КамАЗ автомашинам «Акпарс» агрофирме» ООО ойырен. Ме тиде озанлыкым вуйлатыше Гадил Саматович Ахатовлан кугу таум каласена. Машинашке пӱчкедыме пу материалым, бензопилам, бензогенераторым, кольмым, товарым, маскироватлыме сеткым да молымат тич оптенна ыле. Гуманитар полышым Запорожский областьыште служитлыше салтак-влак деке намиенна. Тушто землякна-влак дене вашлиймаш кужу жаплан шарнымашеш кодеш. Элнан чапшым аралыше-влакын кумылышт нӧлталтын, шинчаончалтышышт лачак сеҥымаш верч кучедалме нерген шижтарен. Ме нунылан, а нуно мыланна ӱшанат. Тыл фронтлан эреак полшен да, кӱлеш лиеш гын, полшаш тӱҥалеш.
В.Смоленцев
Снимкыште: наҥгайышаш ӱзгар-влак.
Фотом Ялозанлык да кочкыш сату министертствын сайтше гыч налме
