Йошкар-Олаште «Мыйын «Юмемлан мурем» регион-влак кӱкшытан духовный муро да поэзий фестиваль эртен.
Тудым Марий митрополий, Руш тӱвыра рӱдер Марий Эл Республикын Тӱвыра, савыктыш да калык-влакын пашашт шотышто министерствыжын полшымыж дене эртареныт.
Православный святой-влак Кирилл ден Мефодийлан памятник воктенысе почмо площадкыште муро пайремыш погынышо-влакым марий митрополит Иоанн, республикысе тӱвыра, савыктыш да калык-влакын пашашт шотышто министрын алмаштышыже Игорь Садовин саламленыт. «Кунам ме православий вера нерген ойлена, Шочмо эл, тӱвыра, образований, просвещений гай умылымаш-влакым ик радамыш шындена. Черке эре калык дене пырля лийын. Поснак эн неле пагытыште Юмылан ӱшан мемнан кугыжанышнам тушман деч аралыме годым кӧргӧ чон дене виян лияш полшен. Чылан пырля лийын моштымына ¬– тиде кугу пиал. Пырля ме элна, шкенан Марий кундемна верч тыршена…», – каласен Игорь Геннадьевич.
«Русьым тынеш пуртымо кечым чапландарышыла ме Владимир князьын сугыньжым шарнышаш улына: «Йӧратыза Юмым, чытышда да сулыкдам касарен моштымашда лийже, православий верада дене кугешныза. Палыза: Юмым йӧратымаш кажне айдемым сай велке вашталта. Тудлан ӱшанымаш Россий державыште илыше чыла тӱрлӧ калыкым ушен, икояным ыштен…»,– палемден Иоанн.
Ты гана фестивальыште Йошкар-Ола да Марий, Волжский епархийла гыч черке хор, рушарня еда коштмо черке школ пеленысе йоча коллектив, вокальный ансамбль, посна автор да мурызо-влак шке усталыкышт дене куандареныт. Чуваший гычат участник-влак лийыныт. Муро, почеламут-влак утларакшым марла йоҥгалтыныт. Курыкмарий район гыч кӱсле дене шоктен мурышо ансамблят лийын. Чыла участниклан тауштымашым кучыктеныт.
28 июльышто 2010 ий гыч мемнан кугыжанышыште Русьым тынеш пуртымо, православий йӱлаште апостол-влак дене тӧр шогалтыме князь Владимирым шарныме кече палемдалтеш. Йошкар-Олаште ты кечын эрденысе литургий деч вара вич храм гыч юмылан ӱшаныше-влак оласе уремла дене ырес да юмоҥа, молитва дене эртеныт. Йӱлам шуктымашке Росгвардийын Марий Элысе управленийжын еҥже-влакат ушненыт. А кечывалым чыла нине храмыште чаҥым кыреныт.
С.Носова
Снимкыште:муро фестиваль годым
Фотом «Православие в Марий Эл» лаштык гыч налме.
