Надежда Тимофеева-Кульшетова – Россий искусствын сулло деятельже, Россий композитор ушемын Марий Элысе пӧлкажын председательже Валерий Кульшетовын пелашыже.
Надежда – мурызо, мурылан семымат воза. Пелашыж дене коктын кок ӱдырым (Вика ден Мария) ончен-куштат.
– Кугурак ӱдырнан кум ияшыж годым икымше гана йоча мурым возенам. Тиддеч вара пашам ты шотышто вияҥын: рушлат, марлат возаш тӱҥалынам, – каласкала Надежда. – Шукерте огыл вич ияш ик ӱдырлан у мурым возышым. Тудо пеш чолга, чулым, мурашат пеш кумылан. Мурым «Молан» манын лӱмдышым. У паша чылалан келша, поснак композитор пелашемын пуымо акше – эн кугу чап.
Н.Тимофеева-Кульшетован возымо мурыжо-влакым эстрадыште чапланыше ятыр мурызо мура.
– Возымемже эшеат шукырак, сандене посна сборникымат савыктен лукташ манын шонем, – ешарыш Надя.
Усталык шӱлышан ешыште икшыве-влакат тыгаяк кумылан кушкыт: Вика нотым огеш пале гынат, фортепьяно дене И.Бахын 1-ше №-ан прелюдийжым шокта, мурашат пеш кертеш. Изирак ӱдырыштат семӱзгарын паҥгаже-влакым перкалаш йӧрата.
– Мутат уке, икшывына-влак музыклан профессионально шӱмаҥ кушкышт манын шонена, но калыкыште манмыла: «Илыш ончыкта», – палемдыш кок шочшан ава.
Н.Тимофеева-Кульшетован возымо икмыняр мурыжын премьерже лишыл жапыште М.Шкетан лӱмеш Марий национальный драме театрын концертыштыже лиеш. Нуным театрын артистше-влак да семмастар шкеже мураш тӱҥалыт.
А.БАЙКОВА
