Лаштыкнан тачысе унаже – Надежда КРЫЛОВА.
Надя Медведево районысо Паганур ялыште шочын-кушкын. Шукерте огыл эстраде аланыш ушнен. Тидым ышташ мо таратен? Репертуарже могайрак? Нине да моло нерген, шкеж дене мутланымеке, пален нална.
– Кунамсек мурет? Ешыштет але родо-тукымет гыч кӧ гай виян йӱкан улат?
– Изиэм годсекак мураш йӧратем. Авамат мураш, кушташ тале лийын, ачамат мурен, гармоньым шоктен. Ик пайремат нунын деч посна эртен огыл. Чаманаш кодеш, ачам уке лийын, тудын деч посна авам огеш муро.
Мо оҥайже, авамын мастарлыкшым Марий телевиденийын ик пашаеҥже ужын да пашашкыже толаш кӱштен, кабинетшымат каласен. Авам мияшыже миен, но кабинетышкыже ала-молан пураш вожылын. Тидын шотышто кызыт тыгерак воштылеш: «Саде кабинетыш пурем ыле гын, эх, кызыт иктаж артист лиям да ала-куштат мурен-куштен коштам ыле дыр!»
Акамат мураш кертын. Тӱҥалтыш класслаште шинчымашым налмыж годым Талантан икшыве-влаклан 1-ше №-ан музыкально-художественный интернат-школыш тунемаш каяш темленыт. Тидлан ача-авам тореш лийыныт, вет мӧҥгыштӧ паша шуко.
– А тыйын шотышто тыгай ӱжмаш лийын огыл?
– Уке, изиэм годым шкетын огыл, а класс дене веле муренам. Мылам кушташ келшен, эсогыл мӧҥгыштӧ кугурак-влаклан концертымат ончыктенам. Артист лияш шоненам да школым пытарыме деч вара культпросветучилищыш тунемаш каяш шоненам, но ачам колтен огыл.
– Вара кушко содыки тунемаш пуренат?
– 11-ше классым Семёновко школышто тунем лекмеке, медицине колледжыш акушерлан тунемаш пуренам. Мылам тиде паша йӧршын лишыл лийын огыл, но тиде специальностьым налмеке, медшӱжарлан пашам ышташ каяш шоненам. Тыште тунемме «Алло, мы ищем талантов» конкурсышто, КВН-ыште да моло вере чолгалыкым ончыктенам, садлан кум ий шижде эртен кайыш.
!!! Материалым тичмашнек «Марий Эл» (2.09.2022) газетыште лудаш темлена!
А.БАЙКОВА мутланен
Фото еш альбомжо гыч
