Йошкар-Олашет эртыше пеледыш пайремыште «Марий ӱдыр» моторлык конкурс шке йырже ятыр калыкым чумырен. Усталыкым, уш-акылым куд конкурсышто Марий Эл гыч гына огыл, Марий кундем деч ӧрдыжтӧ илыше ӱдыр-влакат ончыктеныт. Чылаже 10 еҥ таҥасымашке ушнен: Шернур район гыч Татьяна Кудряшова, Параньга район гыч Анжелика Обухова, Удмурт Республик Алнаш район Варале ял гыч Лилия Алексеева, Провой вел гыч Анжела Филиппова, Марий Турек кундем гыч Кристина Кутузова, Оршанке район гыч Лариса Ипулаева, Медведево вел гыч Татьяна Кондратьева, Кужэҥер район гыч Полина Савельева, Курык сир гыч Диана Михайлова, Татарстан Республик гыч Анна Таныгина.
Эн ончыч пампалче-шамыч «Мый тыгай улам» конкурсышто шкешт дене палдареныт. «Этномодышто» шке вел вургемышт дене ковыртатен коштыныт. Варажым ӱдыр-влак вуйшӱдышым пуненыт.«Тывырдык» конкурсышто конкурсантке-шамыч устан кушталтен пуэныт. Уш-акылым пудыратылше конкурсышто Пеледыш пайремын историйже, марий калыкын йӱлаже, тӱвыраж дене кылдалтше йодышлан вашештеныт. Пытартышлан ӱдыр-влак погынышо каче ден пӧръеҥ-влакым сымыстараш тыршеныт, нунылан муреныт, куштеныт, шинчам пӱялыныт, пырля тавалташ ӱжыныт. А жюрин каҥашаш кайымекыже, Йошкар-Оласе ссузын тунемшыже-влак этнический модо коллекцийым ончыктеныт.
Сенышыш Звенигово кундемын моторжо Анжела Филиппова лектын, кокымшо верым Курыкмарий район гыч Диана Михайловалан пуэныт. Кумшо вер дене Оршанке район гыч Лариса Ипулаева палемдалтын. Моло ӱдырланат пӧлекым кучыктеныт.
Л.ШАБДАРОВА.
Снимкыште: «Марий ӱдыр» конкурсын мотор пампалчыже-влакМ.Скобелевын фотожо.
