Кугыжаныш Погынын председательже Михаил Васютин ден тӱвыра, туризм да спорт комитетын председательже Эдуард Александров РФ Науко да кӱшыл шинчымаш министерствын «Россий Федерацийысе калык-влакын йылмышт нерген» федерал законын проектшым ямдылыме шотышто паша совещанийыкыже видеоконференцкыл форматыште ушненыт.
Российыште руш йылмылан да калык-влакын йылмыштлан полшымо сферыште кугыжаныш политикым илышыш пуртымо шотышто советын ямдылыме законын проектшым Минобрнаукыш каҥашаш колтымо. Кызыт вийыште улшо «Россий Федерацийысе калык-влакын йылмышт нерген» законым 1991 ий 25 октябрьыште пеҥгыдемдыме, сандене тудым тачысе кечылан келыштараш жап шуын.
Элым вуйлатыше законын проектышкыже Российысе калык-влакын йылмышт дене кылдалтше кугыжаныш реестрым почмо, нине йылме-шамычын статусыштым систематизироватлыме, калык-влакын йылмышт нерген законодательстве ден кугыжаныш йылме нерген законодательстве коклаште вашкылым ыштыме шотышто тӧрлатымашлам пурташ да 1 май йотке Кугыжаныш Думыш колташ кӱштен.
Законын проектше Российыште национальный сынан средам ышташ, руш йылмым аралаш да публичный кумдыкышто йот мут-шамычым шагалемдаш полшышаш.
Российысе калык-влакын йылмышт нерген законын проектшым каҥашыме годым марий парламентым вуйлатыше Михаил Васютин палемден: «Документ йылме политике аланыште ик законодательствым пеҥгыдемдаш, тыгак элыштына шуко йылмым аралаш да вияҥдаш кӱлеш. Шуко нациян Российыште калык-влакын йылмыштым арален кодымо да вияҥден колтымо йодыш илышым саемдаш виктаралтше пашаште кугу верым налеш. Ямдылыме проектын южо положенийжым, умылымашыжым да формулировкыжым мучаш марте шукташ, Россий Федерацийын Конституцийжылан, вийыште улшо федерал закон-влаклан келшышын рашемдаш кӱлеш. Совещанийын участникше ден эксперт сообществын еҥже-влак тидын шотышто замечаний ден темлымаш-влакым каласеныт».
Маргарита ИВАНОВА
Снимкыште: Михаил Васютин ден Эдуард Александров Российысе калык-влакын йылмышт нерген законын проектшым каҥашат.
Марий Эл Кугыжаныш Погынын пресс-службыжын фотожо
